US: అందుకే మిసైళ్లతో దాడి చేశాం-అంగీకరించిన అమెరికా..!

అమెరికా-ఇరాన్ మధ్య తిరిగి ఉద్రిక్తలు పురుడుపోసుకున్న వేళ హార్ముజ్ జలసంధిపై ఆధిపత్యం కోసం ఇరుదేశాలూ తీవ్రంగా ప్రయత్నిస్తున్నాయి. ఇదే క్రమంలో ఒమన్ తీరంలో వెళ్తున్న ఓ విదేశీ నౌకపై అమెరికా (US) క్షిపణులతో దాడి చేసింది. ఇందులో ముగ్గురు భారతీయ నావికులు ప్రాణాలు కోల్పోయారు. ఈ ఘటనపై భారత్ మండిపడుతోంది. అమెరికా ఈ దాడుల్ని తక్షణం నిలిపేయాలంటూ ఇవాళ మన విదేశాంగశాఖ పిలుపునిచ్చింది. ఈ నేపథ్యంలో ఆ దాడి వెనుక కారణాల్మి అమెరికా బయటపెట్టింది.

ఒమన్ తీరంలో భారతీయ నావికులు వెళ్తున్న నౌకపై తమ దాడి నిజమేనని అమెరికా ఇవాళ అంగీకరించింది. నౌక ఇంజిన్ గదిలోకి రెండు హెల్‌ఫైర్ క్షిపణులను ప్రయోగించినట్లు యూఎస్ సెంట్రల్ కమాండ్ తెలిపింది. ఈ వారం ఒమన్ సమీపంలో దాడికి గురైన భారతీయ సిబ్బందితో ఉన్న మూడవ నౌక ఇది. ఎక్స్ లో పెట్టిన పోస్ట్‌లో యూఎస్ సెంట్రల్ కమాండ్ .. "ఇరాన్ నుండి ఒమన్ గల్ఫ్ ద్వారా చమురును రవాణా చేయడానికి ప్రయత్నిస్తున్న గినియా-బిస్సావు జెండా కలిగిన M/T జల్వీర్ నౌకపై యూఎస్ సెంట్రల్ కమాండ్ (CENTCOM) చర్య తీసుకుంది. యూఎస్ దళాల ఆదేశాలను సిబ్బంది పదేపదే పాటించడంలో విఫలమైన తర్వాత, ఒక యూఎస్ విమానం నౌక ఇంజిన్ గదిలోకి రెండు హెల్‌ఫైర్ క్షిపణులను ప్రయోగించింది."

ఈ దాడికి సంబంధించిన ఫొటోల్నీ కూడా అమెరికా విడుదల చేసింది. మరోవైపు ఈ దాడి తర్వాత భారత్-అమెరికా మధ్య ఉద్రిక్తతలు పెరుగుతున్నాయి. ఈ దాడిపై వివరణ ఇవ్వాలని ఇప్పటికే అమెరికా భద్రతాధిపతికి భారత్ సమన్లు జారీ చేసింది. ఆయన వివరణ తీసుకున్న తర్వాత తదుపరి చర్యలు చేపట్టే అవకాశం ఉంది. ఇప్పటికే ఈ దాడిపై భారత్ నిరసన వ్యక్తం చేసింది. అయినా అమెరికా మాత్రం హార్ముజ్ ను దాటే నౌకల విషయంలో వెనక్కి తగ్గేలా కనిపించడం లేదు.