ప్రజా ప్రభుత్వ ప్రమాణస్వీకారానికి రండి; ప్రజలకు రేవంత్ రెడ్డి ఆహ్వానం!!

తెలంగాణ రాష్ట్రంలో అసెంబ్లీ ఎన్నికలలో కాంగ్రెస్ పార్టీ మెజారిటీ స్థానాలు సాధించి రాష్ట్రంలో పాలన పగ్గాలు చేపట్టింది. టిపిసిసి చీఫ్ రేవంత్ రెడ్డి తెలంగాణ రాష్ట్ర రెండవ ముఖ్యమంత్రిగా ఎల్బీ స్టేడియంలో ప్రమాణ స్వీకారం చేయనున్నారు. ఈ కార్యక్రమాన్ని చాలా ఘనంగా నిర్వహించాలని కాంగ్రెస్ ప్లాన్ చేసింది. రేవంత్ రెడ్డి ప్రమాణ స్వీకార కార్యక్రమానికి సోనియా గాంధీ, రాహుల్ గాంధీ, మల్లికార్జున ఖర్గే , కేసీ వేణుగోపాల్ తదితరులు రానున్నారు.

ఏఐసీసీ నేతలతో పాటుగా ఇతర రాష్ట్రాల నేతలకు, ముఖ్యమంత్రులకు, మంత్రులకు ఈ మేరకు ఆహ్వానం పంపారు. కర్ణాటక సీఎం సిద్దరామయ్య, డిప్యూటీ సీఎం డీకే శివకుమార్, కర్ణాటక మంత్రులు, తమిళనాడు సీఎం స్టాలిన్, ఏపీ ముఖ్యమంత్రి వైయస్ జగన్మోహన్ రెడ్డి, మాజీ ముఖ్య మంత్రి చంద్రబాబు నాయుడు, తెలంగాణ రాష్ట్ర మాజీ సీఎం కేసీఆర్ కు కూడా ఆహ్వానం పంపారు.

గతంలో తెలంగాణ రాష్ట్రానికి కాంగ్రెస్ పార్టీ ఇన్చార్జిలుగా వ్యవహరించిన దిగ్విజయ్ సింగ్, వీరప్ప మొయిలీ, వాయిలార్ రవి, కుంతియా, మాణిక్యం ఠాగూర్ తదితరులను కూడా ఆహ్వానించారు. తెలంగాణ రాష్ట్రంలోని వివిధ రాజకీయ పార్టీల నేతలకు ఆహ్వానం పంపారు. ఇక హైకోర్టు చీఫ్ జస్టిస్ తో పాటు వివిధ కుల సంఘాల నేతలకు, మేధావులను ఆహ్వానిస్తున్నారు.

తెలంగాణ ఏర్పాటులో కీలక భూమిక పోషించిన చిదంబరం, మీరాకుమారి, సుశీల్ కుమార్ షిండే, కురియన్ మరికొందరు నేతలకు కూడా ఆహ్వానం పంపారు. తెలంగాణ ఉద్యమంలో అమరులైన వారి కుటుంబాలను, ఉద్యమకారులను ఆహ్వానించారు. ఇక వీరికి మాత్రమే కాకుండా రేవంత్ రెడ్డి తెలంగాణ ప్రజలకు అభినందనలు తెలిపి ప్రజా ప్రభుత్వ ప్రమాణస్వీకారానికి ఆహ్వానం పంపారు.

విద్యార్థుల పోరాటం, అమరుల త్యాగం, సోనియాగాంధీ ఉక్కు సంకల్పంతో ఏర్పడిన తెలంగాణ రాష్ట్రంలో మనందరి ఆకాంక్షలు నెరవేర్చే ఇందిరమ్మ రాజ్య స్థాపనకు సమయం ఆసన్నమైందన్నారు. రాష్ట్రంలో ప్రజాస్వామ్య పారదర్శక పాలన అందించేందుకు, బలహీనవర్గాలు, దళిత, గిరిజన, మైనారిటీ, రైతు, మహిళా, యువత సంక్షేమ ప్రభుత్వం ఏర్పాటు చేసేందుకు మీ అందరి ఆశీస్సులతో ఈ 2023 డిసెంబర్ 7న మధ్యాహ్నం ఒంటిగంట నాలుగు నిమిషాలకు ప్రభుత్వం ప్రమాణ స్వీకారం చేయబోతుంది.

ఈ మహోత్సవానికి రావాల్సిందిగా మీ అందరికీ ఇదే ఆహ్వానం.. మీ రేవంత్ రెడ్డి, సీఎల్పీ నాయకుడు అంటూ రేవంత్ రెడ్డి ప్రజలకు ఆహ్వానం పంపారు. తమ ప్రభుత్వాన్ని ఆశీర్వదించాలని కోరారు.

English summary

Revanth Reddy has sent an invitation to people to come to the oath taking of public government. He said that the time has come for the establishment of Indiramma Rajyam.