తెలంగాణకు భారీ వర్షాలు.. ఆ రోజు పరిస్థితి ఏమిటి?

తెలంగాణ వ్యాప్తంగా కొద్దిరోజుల నుంచి విభిన్నమైన వాతావరణం నెలకొని ఉంది. వారం రోజుల క్రితం వరకు ఎండలవల్ల ప్రజలు మాడిపోయారు. ఒక్కసారిగా వాతావరణం చల్లబడటంతో కాస్తంత ఉపశమనం పొందుతున్నారు. తమిళనాడు మీదగా విస్తరించిన ఉపరితల ఆవర్తనంవల్ల రెండు తెలుగు రాష్ట్రాల్లో వానలు కురుస్తున్నాయి. తెలంగాణలో రాబోయే నాలుగురోజులపాటు వర్షాలు కురవనున్నాయని హైదరాబాద్ వాతావరణ కేంద్రం అధికారులు వెల్లడించారు. ద్రోణి ప్రభావంతో ఈనెల 15 వరకు వానలు పడతాయని అంచనా వేస్తున్నారు.

జగిత్యాల, రాజన్న సిరిసిల్ల, సంగారెడ్డి, ఆదిలాబాద్‌, కుమ్రంభీం ఆసిఫాబాద్‌, మంచిర్యాల, నిర్మల్‌, నిజామాబాద్‌, మెదక్‌, జోగులాంబ గద్వాల, నారాయణపేట జిల్లాల్లో శనివారం వర్షాలు కురిసే అవకాశం ఉంది. గంటకు 40 నుంచి 50 కిలోమీటర్ల వేగంతో గాలులు వీస్తాయని, ఉరుములు, మెరుపులుంటాయని, చెట్లదగ్గర ఎవరూ ఉండొద్దని అధికారులు సూచిస్తున్నారు. ఖమ్మం జిల్లా సత్తుపల్లి మండలం సదాశివునిపాలెంలో 6.8 సెంటీమీటర్ల వర్షం శుక్రవారం కురిసింది. సత్తుపల్లిలో 5.1 సెంటీమీటర్లు, మెదక్‌ జిల్లా శంకరంపేటలో 4.7 సెంటీమీటర్లు, నిర్మల్‌ జిల్లా దస్తూరాబాద్‌లో 3.8 సెంటీమీటర్ల చొప్పున వర్షాలు కురిశాయి.

భద్రాద్రి కొత్తగూడెం, సంగారెడ్డి, వనపర్తి, కామారెడ్డి, ఆదిలాబాద్‌, వికారాబాద్‌ జిల్లాల్లోనూ చెదురు మదురుగా వానలు పడ్డాయి. మరోవైపు నిజామాబాద్‌ జిల్లా జకోరాలో 43.6 డిగ్రీల గరిష్ఠ ఉష్ణోగ్రత నమోదైంది. ఈనెల 13న లోక్ సభ ఎన్నికల పోలింగ్ ఉండటం.. ఆ రోజు కూడా వర్ష సూచన ఉండటంతో ప్రధాన పార్టీల తరఫున బరిలోకి దిగిన అభ్యర్థులు ఆందోళన చెందుతున్నారు. వర్షంపై పోలింగ్ ప్రభావం చూపిస్తే ఎవరికి నష్టం కలుగుతుందో అర్థం కాకుండా ఉందని అన్ని పార్టీల అభ్యర్థుల వాపోతున్నారు. సోమవారం ఒక్కరోజు వానలు పడకుండా చూడాలని భగవంతుణ్ని కోరుకోవడమేనని, ఇంతకుమించి తమదగ్గర మార్గం లేదని అన్ని పార్టీల అభ్యర్థులు అంటున్నారు.

English summary

indian meteorological department alert to telangana people