కొండా సురేఖ బర్తరఫ్ ..సంబరాల్లో ఓరుగల్లు కాంగ్రెస్ నేతలు!
తెలంగాణలో సంచలనం సృష్టించిన కొండా సురేఖ బర్తరఫ్ విషయం ఉమ్మడి వరంగల్ జిల్లా కాంగ్రెస్ నేతల సంబరానికి కారణం అయ్యింది. సెప్టెంబర్ 3, 2026న సీఎం రేవంత్ రెడ్డి సిఫార్సు మేరకు గవర్నర్ ఆమోదంతో అటవీ, దేవాదాయ శాఖల మంత్రి పదవి నుంచి కొండా సురేఖను తొలగించిన నేపథ్యంలో జిల్లా కాంగ్రెస్ నేతలు ఆనందం వ్యక్తం చేస్తున్నారు. తమ సుదీర్ఘ పోరాటం ఫలించిందని అంటున్నారు. ఈ బర్తరఫ్ కేవలం ఒక వ్యక్తిపై చర్య కాదు.. ఉమ్మడి వరంగల్ జిల్లా కాంగ్రెస్లో సుదీర్ఘకాలంగా సాగిన పోరాటానికి ముగింపు అని అంటున్నారు.
సురేఖపై జిల్లా నేతల సుదీర్ఘ పోరాటం
కొండా సురేఖ 2023 ఎన్నికల్లో వరంగల్ తూర్పు నుంచి గెలిచి మంత్రి అయిన తర్వాతే ఉమ్మడి వరంగల్ కాంగ్రెస్లో వర్గ విభేదాలు తీవ్రమయ్యాయి. జిల్లా ఎమ్మెల్యేలు, ఎమ్మెల్సీలు, సీనియర్ నేతలతో ఎవరితో కొండా సురేఖకు పడకపోవటం అందుకు కారణం. వారి తీరుతో విసుగు చెందిన నాయకులు సురేఖ, ఆమె భర్త కొండా మురళిపై పలుమార్లు పార్టీ అధిష్టానానికి ఫిర్యాదులు చేశారు.
కొండా సురేఖపై ఎమ్మెల్యేలు, ఎమ్మెల్సీ ఫిర్యాదులు
ప్రధానంగా ఎమ్మెల్యేలు నాయిని రాజేందర్ రెడ్డి, రేవూరి ప్రకాశ్ రెడ్డి, కేఆర్ నాగరాజు, కడియం శ్రీహరి, గండ్ర సత్యనారాయణ, ఎమ్మెల్సీ బస్వరాజు సారయ్య, ఎర్రబెల్లి స్వర్ణ తదితరులు సురేఖ దంపతులు జిల్లాలోని అన్ని నియోజకవర్గాల్లో జోక్యం చేసుకుంటున్నారని, స్థానిక నేతలను పక్కనపెట్టి ఏకపక్ష నిర్ణయాలు తీసుకుంటున్నారని ఆరోపించారు. 2025 జూన్లోనే ఉమ్మడి వరంగల్ ఎమ్మెల్యేలు, ఎమ్మెల్సీలు ఏఐసీసీ ఇన్చార్జ్ మీనాక్షి నటరాజన్ను కలిసి సురేఖ, మురళిపై ఫిర్యాదు చేశారు.
గతంలోనే అధిష్టానానికి అల్టిమేటం ఇచ్చిన ఎమ్మెల్యేలు
కొండా దంపతులు కావాలా.. మేము కావాలా.. తేల్చుకోండి అంటూ హెచ్చరించారు. సోనియా గాంధీ జన్మదిన వేడుకలు కూడా రెండు వర్గాలుగా విడిపోయి జరగడం, ఫ్లెక్సీలపై వాగ్వాదాలు, భద్రకాళి ఆలయ ధర్మకర్తల నియామకాలపై వివాదాలు వంటి సంఘటనలు పార్టీలో ఉద్రిక్తతలు పెంచాయి. సురేఖ తన నియోజకవర్గం కాకుండా ఇతర ఎమ్మెల్యేల ప్రాంతాల్లో జోక్యం చేసుకోవడం, సీనియర్ నేతలను "చిల్లర గాళ్లు" అని అవమానించడం వంటి వ్యాఖ్యలు మరింత ఆగ్రహం రేకెత్తించాయి.
తాజా ఎపిసోడ్ లోనూ ప్రెస్ మీట్ పెట్టి బర్తరఫ్ చెయ్యాలని డిమాండ్
సురేఖ కుమార్తె కొండా సుస్మిత సీఎం రేవంత్ రెడ్డి, ఆయన కుటుంబంపై చేసిన సంచలన వ్యాఖ్యలు పరిస్థితిని ఉధృతం చేశాయి. దీనిపై 19 మందికి పైగా ఎమ్మెల్యేలు, ఎమ్మెల్సీలు గాంధీ భవన్లో ప్రెస్ మీట్ నిర్వహించి సురేఖను మంత్రి పదవి నుంచి తొలగించాలని డిమాండ్ చేశారు. ఇందులో ఓరుగల్లు నేతలే ముందు వరుసలో ఉన్నారు. ఇక తాజాగా సురేఖ బర్తరఫ్ వారిలో సంతోషం నింపింది. హైకమాండ్ మీద విశ్వాసాన్ని పెంచింది.
ఉమ్మడి వరంగల్ కాంగ్రెస్ నేతల సుదీర్ఘ పోరాట విజయం
ఈ నిర్ణయంతో ఉమ్మడి వరంగల్ జిల్లా కాంగ్రెస్ నేతలు ఇది కేవలం ఒక వ్యక్తి బర్తరఫ్ కాదు.. పార్టీలో క్రమశిక్షణ చర్య, జిల్లా పార్టీని ఏకతాటిపై నడిపించే ప్రయత్నం అని చెప్తున్నారు. సురేఖ వర్గం "బీసీ మహిళా నేతపై కుట్ర" అంటున్నా, జిల్లా నేతలు అహంకారం, ఏకపక్ష తీరు, నోటికి వచ్చినట్టు మాట్లాడటం, పార్టీ నాయకత్వాన్ని సవాలు చేసినందుకే ఇది ఫలితం అంటున్నారు.మొత్తంగా కొండా సురేఖ బర్తరఫ్.. ఉమ్మడి వరంగల్ కాంగ్రెస్ నేతల సుదీర్ఘ పోరాట విజయంగా వారు సంబరాలు జరుపుకుంటున్నారు.
Click it and Unblock the Notifications
Sign in with Google