TGSRTC: హైదరాబాద్ టూ నాగార్జున సాగర్.. నాన్ స్టాప్ సర్వీస్ లు..!

తెలంగాణ రాష్ట్ర రోడ్డు రవాణా సంస్థ (TGSRTC) హైదరాబాద్ నుంంచి నాగార్జున సాగర్‌కు మరిన్ని బస్సులను నడపనున్నట్లు ప్రకటించింది. ప్రకృతి రమణీయమైన పట్టణానికి ప్రయాణికుల సంఖ్యను పెంచడానికి వీలు కల్పిస్తున్నట్లు తెలిపింది. గత వారం రోజులుగా ఈ ప్రాంతం భారీ వర్షాలు కురిసిన తర్వాత తెరిచిన డ్యామ్ గేట్ల దృశ్యం ఇటీవల ఎక్కువ మంది పర్యాటకులను ఆకర్షించింది. ఆదివారం నాడు నాగార్జున సాగర్‌ను సందర్శించిన లక్షకు పైగా మందిలో 80 శాతం మంది హైదరాబాద్‌కు చెందినవారే ఉన్నారు.

ఈ నేపథ్యంలోనే బస్సుల సంఖ్య పెంచినట్లు ఆర్టీసీ పేర్కొంది. నాగార్జున సాగర్‌కు ప్రత్యేక డీలక్స్ బస్సులు మహాత్మాగాంధీ బస్ స్టేషన్ నుంచి నడుపుతున్నట్లు ప్రకటించింది. బస్సులు ఉదయం 5:00, 6:45, 7:15, 7:30, 8:00, 9:45, 10 గంటలకు ప్రారంభమవుతాయని TGSRTC అధికారులు తెలిపారు. మధ్యాహ్నం 2:30, సాయంట్రం 5:00 pm, 5:40 pm, గమ్యస్థానానికి ఎటువంటి స్టాప్‌లు లేకుండా చేరుకుంటాయని పేర్కొన్నారు.

మరోవైపు టీజీఎస్‌ ఆర్టీసీ రాష్ట్రంలో ఎలక్ట్రిక్ బస్సుల సంఖ్యను పెంచనుంది. కరీంనగర్ రీజియన్‌కు 70 ఎలక్ట్రిక్ సూపర్ లగ్జరీ బస్సులను కేటాయించారు. ఇందులో 33 బస్సులు ఇప్పటికే కరీంనగర్‌కు చేరుకున్నాయి. ప్రాంతీయ అధికారులు 100 బస్సులు కోరగా, కార్పొరేషన్ అధికారులు 70 బస్సులను కేటాయించినట్లు తెలుస్తోంది. కరీంనగర్-జేబీఎస్ రూట్లో 39, కరీంనగర్-గోదావరిఖని రూట్లో 9, కరీంనగర్-మంథని రూట్లో నాలుగు, కరీంనగర్-కామారెడ్డి రూట్లో 6, కరీంనగర్-జగిత్యాలలో 6, కరీంనగర్-సిరిసిల్ల రూట్లో 6 బస్సులు నడపనున్నట్లు అధికారులు ప్రకటించారు.

మొదటి దశలో కరీంనగర్-హైదరాబాద్ మధ్య స్థూల కాంట్రాక్ట్ (జీసీఎస్) విధానంలో త్వరలో 33 బస్సులు నడుపుతారు. ఎలక్ట్రిక్ పనులు, ఇతర మౌలిక వసతులను అభివృద్ధి చేస్తున్నామని, పెండింగ్‌లో ఉన్న పనులను పూర్తి చేసి త్వరలో పనులు ప్రారంభిస్తామని ఆర్టీసీ అధికారులు తెలిపారు. కరీంనగర్ డిపో 2లో మొత్తం 14 ఛార్జింగ్ పాయింట్లను అభివృద్ధి చేస్తున్నారు. 11 కెవి విద్యుత్ సరఫరా లైన్ వేయడంతో పాటు 12 ఛార్జింగ్ పాయింట్ల ఏర్పాటు పూర్తయింది.

English summary

RTC has announced that the number of buses from Hyderabad to Nagarjuna Sagar has been increased