తెలంగాణ కొత్త డీజీపీగా శివధర్ రెడ్డి

తెలంగాణ ప్రభుత్వం రాష్ట్ర పోలీసు శాఖలో కీలక మార్పులు చేపడుతూ సంచలన నిర్ణయం తీసుకుంది. రాష్ట్ర నూతన డీజీపీగా శివధర్ రెడ్డిని నియమిస్తూ శుక్రవారం అధికారికంగా ఉత్తర్వులు జారీ చేసింది. తెలంగాణ పోలీసు యంత్రాంగానికి శివధర్ రెడ్డి నాయకత్వం వహించనున్నారు.

1994 బ్యాచ్ IPS అధికారి అయిన శివధర్ రెడ్డి, ప్రస్తుతం రాష్ట్ర ఇంటెలిజెన్స్ చీఫ్గా అత్యంత కీలకమైన బాధ్యతలు నిర్వహిస్తున్నారు. ఇంటెలిజెన్స్ చీఫ్‌గా ఆయన సమర్థవంతమైన సేవలను దృష్టిలో ఉంచుకుని, రాష్ట్ర ప్రభుత్వం ఆయనకు అత్యున్నతమైన ఈ పదవిని అప్పగించింది.

ప్రస్తుత డీజీపీ జితేందర్ ఈ నెల (సెప్టెంబర్) నెలాఖరున పదవీ విరమణ చేయనున్నారు. ఆయన స్థానంలో, అక్టోబర్ 1వ తేదీ నుంచి శివధర్ రెడ్డి తెలంగాణ డీజీపీగా బాధ్యతలు స్వీకరించనున్నారు.

శివధర్ రెడ్డి ప్రొఫైల్
బత్తుల శివధర్ రెడ్డి, 1994 బ్యాచ్‌కు చెందిన ఈ సీనియర్ IPS అధికారి తెలంగాణ పోలీసు శాఖలో దైర్యం, నిబద్ధతకు మారుపేరు. హైదరాబాద్‌లో విద్యాభ్యాసం పూర్తి చేసి, న్యాయవాదిగా పనిచేసిన ఆయన, సివిల్ సర్వీసెస్‌లోకి ప్రవేశించారు. మూడు దశాబ్దాల సుదీర్ఘ కెరీర్‌లో అనకాపల్లి ASP నుండి నల్గొండ ఎస్పీ వరకు, గ్రేహౌండ్స్, SIB వంటి కీలక విభాగాల్లో పనిచేశారు.

ముఖ్యంగా, నక్సలైట్ల హింసను (LWE) సమర్థవంతంగా అణిచివేయడంలో, 2007లో మక్కా మసీదు బాంబు పేలుళ్ల అనంతర సంక్షోభాన్ని నియంత్రించడంలో ఆయన పాత్ర కీలకం. తెలంగాణ తొలి ఇంటెలిజెన్స్ చీఫ్‌గా (2014) మరియు మళ్లీ 2023లో తిరిగి బాధ్యతలు చేపట్టిన శివధర్ రెడ్డి, పోలీస్ శౌర్య పతకం సహా పలు విశిష్ట అవార్డులను అందుకున్నారు. శాంతిభద్రతల పరిరక్షణలో ఆయన ట్రాక్ రికార్డుకు నిదర్శనంగా నిలుస్తూ, ఇప్పుడు ఆయన తెలంగాణ కొత్త డీజీపీగా బాధ్యతలు చేపట్టనున్నారు.

English summary

Telangana government appoints Shivdhar Reddy, a 1994 Batch IPS officer, as the new Director General of Police (DGP). Currently serving as the Intelligence Chief, Reddy will assume charge on October 1st, marking a significant change in the state's police administration.