IND vs SL: పసిడి పంచ్‌తో భారత్ అదుర్స్.. శ్రీలంకపై భారీ విజయం!

IND vs SL: 2026 ఆసియా క్రీడల మహిళల క్రికెట్ ఈవెంట్ టైటిల్ మ్యాచ్‌లో తమ స్వర్ణ పరంపరను కొనసాగించి భారత మహిళల క్రికెట్ జట్టు చరిత్ర సృష్టించింది. మంగళవారం జరిగిన ఈ గ్రాండ్ మ్యాచ్‌లో భారత్, శ్రీలంకను 147 పరుగుల భారీ తేడాతో ఓడించి వరుసగా రెండోసారి ఆసియా క్రీడల స్వర్ణ పతకాన్ని కైవసం చేసుకుంది. ఈ విజయంతో 2026 ఆసియా క్రీడల మహిళల క్రికెట్ ఈవెంట్‌లో పతకాల పోడియం కూడా ఖరారైంది. భారత్ స్వర్ణం, శ్రీలంక రజతం, పాకిస్థాన్ కాంస్య పతకాలను గెలుచుకున్నాయి.

ఆసియా క్రీడల్లో అత్యధిక స్కోరు
ముందుగా టాస్ గెలిచిన భారత్ బ్యాటింగ్ ఎంచుకుని నిర్ణీత 20 ఓవర్లలో 3 వికెట్ల నష్టానికి 216 పరుగులు చేసింది, ఇది ఆసియా క్రీడల చరిత్రలో ఓ జట్టు చేసిన అత్యధిక స్కోరు కావడం గమనార్హం. షఫాలీ, స్మృతీ మంధాన 99 పరుగుల ఓపెనింగ్ భాగస్వామ్యంతో పునాది వేశారు. ఆ తర్వాత మంధాన రికార్డు బ్రేకింగ్ ఇన్నింగ్స్, రిచా ఘోష్ విధ్వంసకరమైన ఫినిషింగ్‌తో భారత్ ఆసియా క్రీడల ఫైనల్‌లో అత్యధిక స్కోరు నమోదు చేసింది.

ఈ మ్యాచ్‌లో స్మృతి మంధాన 45 బంతుల్లో 79 పరుగులు చేసింది. ఈ క్రమంలో ఆమె 5 ఫోర్లు, 7 సిక్సర్లు కొట్టి మ్యాచ్‌లో టాప్ స్కోరర్‌గా నిలిచింది. షఫాలీ వర్మ 29 బంతుల్లో 48 పరుగులు చేయగా, రిచా ఘోష్ 22 బంతుల్లో 49 పరుగుల వేగవంతమైన ఇన్నింగ్స్ ఆడింది. ఆమె 6 ఫోర్లు, 3 సిక్సర్లు కొట్టింది.

దీప్తి శర్మ సూపర్ బౌలింగ్.. 69 పరుగులకే లంక ఆలౌట్
217 పరుగుల కొండంత లక్ష్యాన్ని ఛేదించే క్రమంలో, భారత బౌలింగ్, చురుకైన ఫీల్డింగ్ ముందు శ్రీలంక జట్టు పేకముక్కల్లా కూలిపోయింది. శ్రీలంక జట్టు మొత్తం 100 పరుగుల మార్కును కూడా చేరుకోలేక కేవలం 69 పరుగులకే ఆలౌట్ అయింది. భారత బౌలర్లలో ఆఫ్-స్పిన్నర్ దీప్తి శర్మ అత్యంత విజయవంతమైన బౌలర్‌గా నిలిచింది, ఆమె 4 ఓవర్లలో కేవలం 6 పరుగులకే 3 వికెట్లు పడగొట్టింది. అదే సమయంలో అద్భుతమైన బ్యాటింగ్ ప్రదర్శించిన షెఫాలీ వర్మ బౌలింగ్‌లో కూడా విధ్వంసం సృష్టించి, 2 ఓవర్లలో కేవలం 3 పరుగులకే 2 వికెట్లు తీసింది. ఇది కాకుండా శ్రీ చరణి 2 వికెట్లు తీయగా, శ్రేయాంక పాటిల్ 2 వికెట్లు పడగొట్టింది.

English summary

Asian Games 2026, India Women's cricket team won gold, defeating Sri Lanka by 147 runs. Smriti Mandhana scored 79 while Deepti Sharma took 3 wickets for 6.