IT Jobs: ఫ్రెషర్లకు జాక్‌పాట్... HCL Tech కళ్లు చెదిరే ప్యాకేజీ

ఐటీ అంటేనే ఫ్రెషర్లకు వణుకుపుడుతుంది. కొత్త ఉద్యోగ అవకాశాలు ఎక్కడా దొరడం లేదు. ఒక వేళ నోటిఫికేషన్ కనిపించినా ఎక్స్పీరియన్స్ అడుగుతున్నారు. దీంతో వారికి దిక్కు తోచని పరిస్థితి. వీటికి తోడు ఐటీలో జరుగుతున్న లేఆఫ్ లు మరింత కలవరపెడుతున్నాయి.. ఈ టైమ్ లోనే ఇంద్ర సినిమాలో టైటిల్ డైలాగ్ "నేనున్నానే నానమ్మ" అంటూ.. ఐటీ లో ఫ్రెషర్లకు నేనున్నాను అంటూ భరోసా ఇస్తుంది ఓ ప్రముఖ కంపెనీ. అంతే కాదు రొటీన్ బేసిక్ శాలరీ విధానానికి కూడా ఎండ్ వేస్తామంటుంది ఆ సంస్థ

ఐటీ రంగంలో అడుగుపెట్టే కొత్త ఇంజనీర్లకు ఇది నిజంగా కలల కాలంగా మారుతోంది. సంప్రదాయ ఫ్రెషర్ ప్యాకేజీలకు పూర్తిగా భిన్నంగా, అత్యాధునిక సాంకేతిక నైపుణ్యాలు కలిగిన అభ్యర్థులకు భారీ వేతనాలను ఆఫర్ చేయడానికి ప్రముఖ సాఫ్ట్‌వేర్ సంస్థలు ముందుకు వస్తున్నాయి. ఈ జాబితాలో తాజాగా హెచ్‌సీఎల్‌టెక్ (HCLTech) ప్రత్యేక ఆకర్షణగా నిలుస్తోంది.

ఆర్టిఫిషియల్ ఇంటెలిజెన్స్, సైబర్ సెక్యూరిటీ వంటి భవిష్యత్ టెక్నాలజీల్లో నైపుణ్యం కలిగిన ఫ్రెషర్లను సంస్థ 'ఎలైట్ క్యాడర్'గా గుర్తించి, వారికి ఏడాదికి రూ.18 లక్షల నుంచి రూ.22 లక్షల వరకు ప్రారంభ వేతనం అందించేందుకు సిద్ధమవుతోంది. సాధారణంగా ఫ్రెషర్లకు లభించే సగటు ప్యాకేజీలతో పోలిస్తే ఇది మూడు నుంచి నాలుగు రెట్లు ఎక్కువగా ఉండడం విశేషం.

ఈ ఏడాది మాత్రమే హెచ్‌సీఎల్‌టెక్ 10 వేల మందికి పైగా ఫ్రెషర్లను నియమించుకుంది. అయితే అందరిలోనూ కాకుండా, ప్రత్యేకంగా మార్కెట్‌లో అత్యంత డిమాండ్ ఉన్న నైపుణ్యాలు కలిగిన వారినే ఈ ఎలైట్ కేటగిరీలోకి తీసుకుంటున్నారు. కంపెనీ డిజిటల్ ట్రాన్స్‌ఫర్మేషన్, క్లౌడ్, సెక్యూరిటీ ప్రాజెక్టులకు ఇలాంటి టాలెంట్ కీలకమని సంస్థ వర్గాలు చెబుతున్నాయి.

హెచ్‌సీఎల్‌టెక్ మాత్రమే కాదు, ఇతర ఐటీ దిగ్గజాలు కూడా ఇదే దారిలో సాగుతున్నాయి. ఇన్ఫోసిస్ వంటి సంస్థలు స్పెషలిస్ట్ ప్రోగ్రామర్, పవర్ ప్రోగ్రామర్ వంటి ప్రత్యేక రోల్స్ ద్వారా ఫ్రెషర్లకు రూ.20 లక్షలకు పైగా ప్యాకేజీలను అందిస్తున్నాయి. దీని ద్వారా సాధారణ కోడింగ్ పరిజ్ఞానం కంటే ప్రత్యేక నైపుణ్యాలకే మార్కెట్ ఎక్కువ విలువ ఇస్తోందని స్పష్టమవుతోంది.

ఈ భారీ వేతన అవకాశాలు ముఖ్యంగా AI & మెషిన్ లెర్నింగ్, సైబర్ సెక్యూరిటీ, క్లౌడ్ కంప్యూటింగ్, డేటా అనలిటిక్స్ వంటి రంగాల్లో నైపుణ్యం కలిగిన అభ్యర్థులకు అందుబాటులో ఉన్నాయి. కేవలం డిగ్రీ ఉంటే సరిపోదు... మారుతున్న టెక్నాలజీకి అనుగుణంగా నైపుణ్యాలను అప్‌డేట్ చేసుకున్నవారికే ఈ అవకాశాలు దక్కుతున్నాయని నిపుణులు చెబుతున్నారు.

మొత్తంగా చూస్తే, ఐటీ రంగంలో ఫ్రెషర్లకు ఇది ఒక కీలక మలుపు. సరైన నైపుణ్యాలుంటే కెరీర్ ప్రారంభ దశలోనే లక్షల్లో వేతనం సాధ్యమవుతోందన్న సంకేతాలు స్పష్టంగా కనిపిస్తున్నాయి. డిగ్రీతో పాటు నిచ్ స్కిల్స్‌పై దృష్టి పెట్టిన యువతకు రాబోయే రోజులు మరింత ఆశాజనకంగా ఉండబోతున్నాయని పరిశ్రమ వర్గాలు విశ్లేషిస్తున్నాయి.

English summary

Top IT firms like HCLTech and Infosys are offering fresh engineers salaries up to ₹22 lakh per year for elite roles in AI, cybersecurity, cloud computing, and data analytics, signaling a major shift in fresher hiring trends.