IBPS Announces 2026: జాబ్ క్యాలెండ‌ర్ వచ్చేసింది. పరీక్షల తేదీలు ఇవే

బ్యాంక్ ఉద్యోగాల కోసం సిద్ధమవుతున్న లక్షలాది అభ్యర్థులకు ఇన్‌స్టిట్యూట్ ఆఫ్ బ్యాంకింగ్ పర్సనల్ సెలక్షన్ (IBPS) శుభవార్త చెప్పింది. 2026 సంవత్సరంలో ప్రభుత్వ రంగ బ్యాంకులు, ప్రాంతీయ గ్రామీణ బ్యాంకుల్లో ఖాళీల భర్తీ కోసం నిర్వహించనున్న పరీక్షల షెడ్యూల్‌, పోస్టుల వివరాలను తాజాగా ప్రకటించింది. ఈ ప్రకటనతో నిరుద్యోగులు, బ్యాంకింగ్ రంగంలో కెరీర్ లక్ష్యంగా పెట్టుకున్న యువతలో కొత్త ఉత్సాహం నెలకొంది.

ప్రతి ఏడాదిలాగే 2026లో కూడా ఐబీపీఎస్ ద్వారా క్లర్క్, ప్రొబేషనరీ ఆఫీసర్ (PO), స్పెషలిస్ట్ ఆఫీసర్ (SO), రీజినల్ రూరల్ బ్యాంక్స్ (RRB) పోస్టులకు నియామక ప్రక్రియ చేపట్టనుంది. ఇందుకోసం ప్రిలిమినరీ పరీక్షలు, మెయిన్స్ పరీక్షలు, అవసరమైన చోట ఇంటర్వ్యూలు నిర్వహించనున్నట్లు స్పష్టం చేసింది. ముందుగానే పరీక్షల క్యాలెండర్ విడుదల చేయడం వల్ల అభ్యర్థులు తమ ప్రిపరేషన్‌ను సక్రమంగా ప్లాన్ చేసుకునే అవకాశం లభించింది.

ఐబీపీఎస్ ఆర్ఆర్బీ..

ఐబీపీఎస్ ఆర్ఆర్బీ(IBPS RRB) పోస్టులకు సంబంధించిన పరీక్షలు 2026 జూలై-ఆగస్టు మధ్య ప్రిలిమినరీ దశలో నిర్వహించే అవకాశం ఉంది. ఆ తర్వాత మెయిన్స్ పరీక్షలు సెప్టెంబర్-అక్టోబర్ నెలల్లో జరగనున్నాయి. ఇందులో ఆఫీస్ అసిస్టెంట్, ఆఫీసర్ స్కేల్-1, స్కేల్-2, స్కేల్-3 పోస్టులు ఉంటాయి. ఈ పోస్టులకు ప్రిలిమ్స్, మెయిన్స్‌తో పాటు ఉన్నత స్థాయి పోస్టులకు ఇంటర్వ్యూలు కూడా నిర్వహిస్తారు.

క్లర్క్..

క్లర్క్ పోస్టులకు సంబంధించి ప్రిలిమినరీ పరీక్షలను ఆగస్టు 2026లో, మెయిన్స్ పరీక్షలను అక్టోబర్ 2026లో నిర్వహించే అవకాశం ఉన్నట్లు ఐబీపీఎస్ తెలిపింది. క్లర్క్ నియామకాల్లో ఇంటర్వ్యూ ఉండదన్న విషయం తెలిసిందే. కేవలం ప్రిలిమ్స్, మెయిన్స్‌లో వచ్చిన మార్కుల ఆధారంగానే తుది ఎంపిక జరుగుతుంది.

ప్రొబేషనరీ ఆఫీసర్

ప్రొబేషనరీ ఆఫీసర్ (PO) / మేనేజ్‌మెంట్ ట్రైనీ పోస్టులకు సంబంధించి ప్రిలిమ్స్ పరీక్షలు అక్టోబర్ 2026లో, మెయిన్స్ పరీక్షలు నవంబర్ 2026లో నిర్వహించనున్నారు. వీటిలో ఉత్తీర్ణత సాధించిన అభ్యర్థులకు 2027 ప్రారంభంలో ఇంటర్వ్యూలు నిర్వహిస్తారు. బ్యాంకింగ్ రంగంలో అధికార స్థాయి ఉద్యోగం కోరుకునే అభ్యర్థులకు ఇది అత్యంత కీలక పరీక్షగా భావిస్తారు.

స్పెషలిస్ట్ ఆఫీసర్

అలాగే స్పెషలిస్ట్ ఆఫీసర్ (SO) పోస్టులకు ప్రిలిమ్స్ పరీక్షలు నవంబర్ 2026లో, మెయిన్స్ పరీక్షలు డిసెంబర్ 2026లో నిర్వహించనున్నట్లు పేర్కొన్నారు. ఐటీ ఆఫీసర్, అగ్రికల్చర్ ఫీల్డ్ ఆఫీసర్, లా ఆఫీసర్, హెచ్‌ఆర్ ఆఫీసర్ వంటి ప్రత్యేక నైపుణ్యాలు ఉన్న అభ్యర్థులకు ఈ పోస్టులు మంచి అవకాశంగా నిలుస్తాయి.

మొత్తానికి 2026లో బ్యాంక్ ఉద్యోగాల కోసం పెద్ద ఎత్తున అవకాశాలు అందుబాటులోకి రానున్నాయి. ఇప్పటి నుంచే క్రమబద్ధంగా చదువుతూ, సరైన వ్యూహంతో సిద్ధమైతే ప్రభుత్వ బ్యాంక్ ఉద్యోగం సాధించవచ్చని నిపుణులు సూచిస్తున్నారు. బ్యాంకింగ్ రంగంలో స్థిరమైన కెరీర్ కోరుకునే అభ్యర్థులకు ఇది నిజంగా శుభసూచకమే.

గమనిక: ఇవి ఐబీపీఎస్ విడుదల చేసిన టెంటేటివ్ క్యాలెండర్ ఆధారంగా ఉన్న తేదీలు. ఖచ్చితమైన తేదీలు సంబంధిత నోటిఫికేషన్‌లతో ప్రకటిస్తారు.

English summary

IBPS has released the tentative exam schedule for bank recruitment in 2026, including Clerk, PO, SO, and RRB posts. The announcement helps job aspirants plan their preparation effectively.