Punjab National Bank: 5,138 పోస్టుల భర్తీకి నోటిఫికేషన్

నిరుద్యోగ యువతకు శుభవార్త. దేశంలోని ప్రముఖ ప్రభుత్వ రంగ బ్యాంక్ పంజాబ్ నేషనల్ బ్యాంక్ (Punjab National Bank) భారీగా అప్రెంటిస్ పోస్టుల భర్తీకి నోటిఫికేషన్ విడుదల చేసింది. మొత్తం 5,138 అప్రెంటిస్ పోస్టులు భర్తీ చేయనున్నట్లు ప్రకటించింది. బ్యాంకింగ్ రంగంలో అడుగుపెట్టాలనుకునే డిగ్రీ అర్హత గల అభ్యర్థులకు ఇది మంచి అవకాశం.

రాష్ట్రాల వారీగా చూస్తే ఆంధ్రప్రదేశ్‌లో 56 పోస్టులు, తెలంగాణలో 69 పోస్టులు ఉన్నాయి. ఇవి కాకుండా దేశవ్యాప్తంగా అన్ని రాష్ట్రాలు, కేంద్ర పాలిత ప్రాంతాల్లో కూడా పోస్టులు ఉన్నాయి. స్థానిక యువతకు ప్రాధాన్యం కల్పించే విధంగా నియామక ప్రక్రియ కొనసాగనుంది.

ఈ అప్రెంటిస్ పోస్టులకు ఏదైనా విభాగంలో డిగ్రీ పూర్తి చేసిన అభ్యర్థులు అర్హులు. వయస్సు కనీసం 20 సంవత్సరాలు, గరిష్టంగా 28 సంవత్సరాలు ఉండాలి. ఎస్సీ, ఎస్టీ, ఓబీసీ, పీడబ్ల్యూడీ వంటి రిజర్వేషన్ కేటగిరీలకు ప్రభుత్వ నిబంధనల ప్రకారం వయో సడలింపు వర్తిస్తుంది.

ఫిబ్రవరి 8 నుంచి అప్లై చేసుకోవచ్చు..

అభ్యర్థులు ఫిబ్రవరి 8 నుంచి ఫిబ్రవరి 24, 2026 వరకు దరఖాస్తు చేసుకోవచ్చు. అయితే దరఖాస్తు చేయడానికి ముందు ఒక ముఖ్యమైన నిబంధన ఉంది. అభ్యర్థులు తప్పనిసరిగా NATS (National Apprenticeship Training Scheme) పోర్టల్‌లో ముందుగా ఎన్‌రోల్ కావాలి. NATS ఎన్‌రోల్మెంట్ లేకుండా దరఖాస్తు స్వీకరించబడదు.

ఎంపిక ప్రక్రియ మొత్తం మూడు దశల్లో జరుగుతుంది. మొదటగా రాత పరీక్ష నిర్వహిస్తారు. ఇందులో అర్హత సాధించిన అభ్యర్థులకు డాక్యుమెంట్ వెరిఫికేషన్ (DV) ఉంటుంది. చివరిగా లోకల్ లాంగ్వేజ్ టెస్ట్ ద్వారా స్థానిక భాషపై అభ్యర్థుల అవగాహనను పరీక్షిస్తారు. అన్ని దశల్లో అర్హత సాధించిన వారిని అప్రెంటిస్‌లుగా ఎంపిక చేస్తారు.

Punjab National Bank మంచి పునాది..

అప్రెంటిస్ శిక్షణ ద్వారా బ్యాంకింగ్ కార్యకలాపాలపై ప్రాయోగిక అవగాహన, కార్యాలయ అనుభవం లభిస్తుంది. భవిష్యత్తులో బ్యాంక్ ఉద్యోగాలు లేదా ఇతర ప్రభుత్వ, ప్రైవేట్ రంగ ఉద్యోగాలకు ఇది మంచి పునాది అవుతుంది. ముఖ్యంగా బ్యాంకింగ్ రంగంలో కెరీర్ నిర్మించాలనుకునే నిరుద్యోగ యువతకు ఇది విలువైన అవకాశం.

మరిన్ని వివరాలు, అధికారిక నోటిఫికేషన్, ఆన్‌లైన్ అప్లికేషన్ కోసం అభ్యర్థులు PNB అధికారిక వెబ్‌సైట్ - https://pnb.bank.in ను సందర్శించాలని బ్యాంక్ సూచించింది. దరఖాస్తు తేదీలు, అర్హత నిబంధనలు జాగ్రత్తగా పరిశీలించి అప్లై చేసుకోవడం మంచిది

English summary

Punjab National Bank has released Apprentice Recruitment 2026 notification for 5,138 posts. Graduates can apply online from Feb 8 to Feb 24. AP 56 posts, Telangana 69 posts.