TG ఈసెట్, లాసెట్‌ పరీక్షల షెడ్యూల్‌ రిలీజ్.. ఎప్పుడంటే ?

తెలంగాణ రాష్ట్రంలో 2026-27 విద్యా సంవత్సరానికి సంబంధించి ఈసెట్ (TS ECET), లాసెట్ (TS LAWCET) ప్రవేశ పరీక్షల షెడ్యూల్‌ను ఉమ్మడి ప్రవేశ పరీక్షల కమిటీ (CET Committee) అధికారికంగా విడుదల చేసింది. ఈ పరీక్షలకు సంబంధించిన నోటిఫికేషన్‌లు, దరఖాస్తుల తేదీలతో కూడిన పూర్తి షెడ్యూల్‌ను ప్రకటించారు. ఈ ప్రకటనతో రాష్ట్రవ్యాప్తంగా ఉన్న వేలాది మంది విద్యార్థులకు స్పష్టత వచ్చింది.

లాసెట్ షెడ్యూల్ వివరాలు..

తాజా షెడ్యూల్ ప్రకారం తెలంగాణ లాసెట్ నోటిఫికేషన్ ఫిబ్రవరి 8, 2026న విడుదల కానుంది. ఆన్‌లైన్ దరఖాస్తుల స్వీకరణ ఫిబ్రవరి 10 నుంచి ప్రారంభమవుతుంది. ఎలాంటి ఆలస్య రుసుము లేకుండా ఏప్రిల్ 10 వరకు దరఖాస్తులు చేసుకునే అవకాశం కల్పించారు. అనంతరం ఆలస్య రుసుముతో దరఖాస్తుల స్వీకరణ తేదీలను విడిగా ప్రకటించే అవకాశం ఉందని అధికారులు తెలిపారు.

లాసెట్ అర్హతల విషయానికి వస్తే..

• ఇంటర్ పూర్తి చేసిన లేదా ఇంటర్ సెకండ్ ఇయర్ చదువుతున్న విద్యార్థులు - ఐదేళ్ల ఎల్‌ఎల్‌బీ కోర్సుకు
• డిగ్రీ పూర్తి చేసిన అభ్యర్థులు - మూడేళ్ల ఎల్‌ఎల్‌బీ కోర్సుకు
• ఎల్‌ఎల్‌బీ పూర్తయిన అభ్యర్థులు - రెండేళ్ల ఎల్‌ఎల్‌ఎం కోర్సులకు లాసెట్ ద్వారా ప్రవేశాలు పొందవచ్చు.

గత సంవత్సరాలతో పోలిస్తే ఈసారి లాసెట్‌కు దరఖాస్తుల సంఖ్య పెరిగే అవకాశం ఉందని అధికారులు అంచనా వేస్తున్నారు. అందువల్ల దరఖాస్తుల సంఖ్యను బట్టి పరీక్ష కేంద్రాల పెంపుపై నిర్ణయం తీసుకుంటామని వెల్లడించారు.

ఈసెట్ 2026 వివరాలు..

ఇక తెలంగాణ ఈసెట్ 2026 నోటిఫికేషన్ ఫిబ్రవరి 5న విడుదల కానుంది. ఈసెట్ ఆన్‌లైన్ దరఖాస్తుల స్వీకరణ ఫిబ్రవరి 9 నుంచి ప్రారంభమవుతుంది. ఎలాంటి ఆలస్య రుసుము లేకుండా ఏప్రిల్ 18 వరకు దరఖాస్తులు స్వీకరిస్తారు. ముఖ్యంగా ఈసారి ఈసెట్ దరఖాస్తు ప్రక్రియ గత ఏడాదితో పోలిస్తే దాదాపు 20 రోజుల ముందుగానే ప్రారంభమవడం గమనార్హం.

ఈసెట్ ర్యాంకు ఆధారంగా పాలిటెక్నిక్ డిప్లొమా పూర్తి చేసిన విద్యార్థులు, బీఎస్సీ (మ్యాథమెటిక్స్) పూర్తి చేసిన అభ్యర్థులు.. ఇంజనీరింగ్, ఫార్మసీ కళాశాలల్లో లేటరల్ ఎంట్రీ విధానంలో నేరుగా బీటెక్, బీఫార్మసీ రెండో సంవత్సరంలో ప్రవేశాలు పొందవచ్చు.

అధికారుల సూచనలు..

దరఖాస్తుల సంఖ్యను బట్టి పరీక్ష కేంద్రాల సంఖ్య పెంచే అంశంపై నిర్ణయం తీసుకుంటామని అధికారులు తెలిపారు. విద్యార్థులకు ఇబ్బందులు లేకుండా పరీక్షలు నిర్వహించేందుకు అన్ని ఏర్పాట్లు చేస్తున్నామని పేర్కొన్నారు. అలాగే దరఖాస్తు సమయంలో వివరాలు సరిగా నమోదు చేయాలని, చివరి తేదీల కోసం వేచి ఉండకుండా ముందుగానే దరఖాస్తు చేసుకోవాలని సూచించారు.

విద్యార్థులకు కీలక సూచన..

లాసెట్, ఈసెట్ రెండింటికీ సంబంధించి అధికారిక వెబ్‌సైట్‌ల ద్వారా మాత్రమే దరఖాస్తు చేయాలని, తప్పుడు సమాచారం నమ్మవద్దని అధికారులు హెచ్చరించారు. పరీక్ష తేదీలు, హాల్ టికెట్లు, పరీక్ష కేంద్రాల వివరాలను తదుపరి నోటిఫికేషన్‌ల ద్వారా ప్రకటిస్తామని తెలిపారు.

English summary

The Joint Entrance Examinations Committee (CET Committee) has officially released the schedule for the TS ECET and TS LAWCET entrance examinations for the 2026-27 academic year in the state of Telangana.