'12A రైల్వే కాలనీ' రివ్యూ అల్లరి నరేష్ కొత్త ప్రయోగం...థ్రిల్ ఇచ్చిందా..?

కామెడీ సినిమాలతో ప్రేక్షకులను అలరించిన అల్లరి నరేష్, ఇటీవల వైవిధ్యభరితమైన కథాంశాల వైపు మొగ్గు చూపుతున్నారు. ఈ క్రమంలో ఆయన హీరోగా, కామాక్షి హీరోయిన్‌గా, సాయి కుమార్ కీలక పాత్రలో నాని కాసరగడ్డ దర్శకత్వంలో తెరకెక్కిన చిత్రం '12A రైల్వే కాలనీ'. 'పొలిమేర', 'పొలిమేర 2' వంటి సక్సెస్‌ఫుల్ సినిమాలను నిర్మించిన మేకర్స్ నుండి ఈ సినిమా రావడంతో అంచనాలు భారీగా పెరిగాయి. మరి ఈ థ్రిల్లింగ్ సబ్జెక్ట్ ప్రేక్షకులను ఎంతవరకు మెప్పించిందో చూద్దాం.

కథ:

'12A రైల్వే కాలనీ' కథ కార్తీక్ (అల్లరి నరేష్) చుట్టూ తిరుగుతుంది. కార్తీక్ తన స్నేహితుల గ్యాంగ్‌తో కలిసి ఒక రాజకీయ నాయకుడికి అండదండగా ఉంటాడు. ఈ క్రమంలో ఆ ఊరిలో ఉండే కామాక్షిని చూసి ప్రేమలో పడతాడు. వారి ప్రేమకథ సాఫీగా సాగుతున్న సమయంలో, కామాక్షి మరియు ఆమె తల్లి దారుణంగా హత్యకు గురవుతారు. దీంతో కార్తీక్ తన ప్రేమించిన అమ్మాయి, ఆమె తల్లిని ఎవరు చంపారనే విషయాన్ని తెలుసుకోవడానికి ఇన్వెస్టిగేషన్ మొదలుపెడతాడు. ఈ దర్యాప్తులో అతనికి ఒక భయంకరమైన నిజం తెలుస్తుంది. అసలు ఆ భయంకరమైన నిజం ఏమిటి? ఈ హత్యల వెనుక ఉన్నదెవరు? అనేదే సినిమా అసలు కథ.

కథనం, దర్శకత్వం: థ్రిల్ ఉంది...

'పొలిమేర' సిరీస్ మేకర్స్ ఈ చిత్రాన్ని నిర్మించడం వలన థ్రిల్లర్ లవర్స్‌లో ఆసక్తి పెరిగింది. దర్శకుడు నాని కాసరగడ్డ ఈ అంచనాలను అందుకోవడంలో కొంతవరకు విజయం సాధించాడని చెప్పవచ్చు.

మొదటి భాగం : హీరో గ్యాంగ్ పనులు, హీరోయిన్‌తో లవ్ ట్రాక్ , ఆమె మర్డర్ చుట్టూ తిరగడం ఆసక్తిని రేకెత్తిస్తుంది. హత్య తర్వాత కథనం మలుపు తిరుగుతుంది.

రెండవ భాగం : హీరోయిన్ మర్డర్ తర్వాత ఏం జరగబోతోందనే ఆసక్తిని దర్శకుడు సృష్టించాడు. అయితే, కథనంలో వచ్చే కొన్ని సీన్లు మళ్లీ మళ్లీ రిపీట్ అవుతున్న భావన కలిగిస్తాయి. క్లైమాక్స్‌లో ఒక మంచి ట్విస్ట్ ఉన్నప్పటికీ, ఆ ట్విస్ట్‌ను ప్రేక్షకులకు చివర్లో అందించడానికి సినిమా మొత్తం ఒకే టోన్‌లో లాగేశారనే ఫీలింగ్ కలుగుతుంది. 'ఒక క్లైమాక్స్ కోసం సినిమా మొత్తం తీసినట్టు ఉంది' అన్నట్టుగా సినిమా ముగుస్తుంది. అయినప్పటికీ, దర్శకుడి మేకింగ్ స్టైల్ మరియు సినిమాటోగ్రఫీ మాత్రం మెప్పిస్తాయి. నిర్మాణ విలువలు బాగున్నాయి. బ్యాక్ గ్రౌండ్ స్కోర్ పర్వాలేదు.అల్లరి నరేష్ లాంటి కామెడీ ఇమేజ్ ఉన్న హీరోతో థ్రిల్లింగ్ సబ్జెక్ట్ ఎంచుకోవడం మంచిదే అయినా, ప్రేక్షకులు ఆశించే థ్రిల్లింగ్ ఎలిమెంట్స్ లో ఎక్కడో లోపం ఉందనే భావన కలుగుతుంది.

నటీనటుల ప్రతిభ:

అల్లరి నరేష్ కార్తీక్ పాత్రలో తన పరిధి మేరకు బాగానే నటించాడు. ముఖ్యంగా కొన్ని ఎమోషనల్ మరియు దర్యాప్తు సన్నివేశాలలో అతని నటన ఆకట్టుకుంటుంది.కామాక్షి హీరోయిన్‌గా పర్వాలేదనిపించింది.సాయి కుమార్ తనదైన స్క్రీన్ ప్రెజెన్స్‌తో పాత్రకు బలాన్నిచ్చారు.మిగిలిన నటీనటులు తమ పాత్రల మేరకు రాణించారు.

ముగింపు:

'12A రైల్వే కాలనీ' ఒక డిఫరెంట్ సబ్జెక్ట్‌ను ఎంచుకున్నప్పటికీ, దానిని పూర్తి స్థాయిలో ప్రేక్షకులకు అందించడంలో కాస్త తడబడింది. కొంత భయం, కొంత థ్రిల్ మిశ్రమంగా ఉన్న ఈ సినిమా, ఒకసారి చూడదగిన థ్రిల్లర్‌గా నిలుస్తుంది.

రేటింగ్: 3/5