ముఖ్యమంత్రి కొడుకుతో స్టార్ బ్యూటీ పెళ్లి.. కానీ 11 రోజులకే !!
సాధారణంగా వెండితెరపై నవ్వులు పంచే నటీనటుల జీవితాలు బయటకు కనిపించేంత రంగులమయం కావని అంటుంటారు. వారి వ్యక్తిగత జీవితాల్లో ఎన్నో విషాదాలు, కన్నీటి కథలు దాగి ఉంటాయని చెబుతారు. అలాంటి హృదయ విదారక జీవితాన్ని గడిపిన బాలీవుడ్ నటి పేరు లీనా చందావార్కర్. ఒకప్పుడు అందం, అభినయంతో బాలీవుడ్ను ఊపేసిన ఈ స్టార్ హీరోయిన్ జీవితం వరుస విషాదాలతో నిండిపోయింది. పెళ్లైన కేవలం 11 రోజుల్లోనే భర్తను కోల్పోవడం.. ఆ తర్వాత ప్రేమించి రెండో పెళ్లి చేసుకున్న వ్యక్తిని కూడా కొద్ది కాలానికే కోల్పోవడం.. ఇలా ఆమె జీవితంలో జరిగిన సంఘటనలు ఎవరినైనా కంటతడి పెట్టిస్తాయి.
ఆర్మీ ఫ్యామిలిలో జన్మించిన అందాల నటి..
లీనా చందావార్కర్ కర్ణాటకలోని ధారవాడ ప్రాంతానికి చెందిన ఓ సైనిక కుటుంబంలో జన్మించారు. చిన్నప్పటి నుంచే అందం, ఆత్మవిశ్వాసంతో ప్రత్యేక గుర్తింపు పొందిన ఆమె.. మోడలింగ్ పోటీల్లో పాల్గొని సినీ రంగంలోకి అడుగుపెట్టారు. 1968లో విడుదలైన 'మన్ కా మీత్' చిత్రంతో బాలీవుడ్లో హీరోయిన్గా ఎంట్రీ ఇచ్చారు. ఈ సినిమాలో హీరోగా యువ స్టార్ వినోద్ ఖన్నా నటించారు. మొదటి సినిమాతోనే లీనా ప్రేక్షకుల హృదయాలను గెలుచుకున్నారు. అందం, అభినయం, స్క్రీన్ ప్రెజెన్స్తో ఆమెకు వరుస అవకాశాలు వచ్చాయి. అనంతరం రాజేష్ ఖన్నా, దిలీప్ కుమార్, ధర్మేంద్ర, సంజీవ్ కుమార్ వంటి అగ్ర హీరోల సరసన నటించి బాలీవుడ్లో స్టార్ హీరోయిన్గా ఎదిగారు.
సీఎం కుమారుడితో ప్రేమ..పెళ్లి
కాగా కెరీర్ పీక్స్లో ఉన్న సమయంలో లీనా జీవితంలోకి రాజకీయ నేపథ్యం ఉన్న యువకుడు సిద్ధార్థ్ బందోద్కర్ వచ్చారు. ఆయన గోవా తొలి ముఖ్యమంత్రి అయిన దయానంద్ బందోద్కర్ కుమారుడు. ఇద్దరూ ప్రేమలో పడి వివాహం చేసుకోవాలని నిర్ణయించుకున్నారు. ఒకవైపు సినీ రంగంలో అగ్ర హీరోయిన్.. మరోవైపు ముఖ్యమంత్రి కుమారుడితో వివాహం.. దీంతో ఆమె జీవితం ఇక కలల ప్రపంచంలా మారుతుందని అందరూ భావించారు. అప్పుడు లీనా వయసు కేవలం 24 ఏళ్లు.
పెళ్లైన 11 రోజుల్లోనే ఊహించని విషాదం
అయితే విధి ఆమె కోసం మరో కథ రాసి పెట్టింది. పెళ్లి జరిగిన కేవలం 11 రోజులకే ఆమె జీవితంలో పెను విషాదం చోటుచేసుకుంది. సిద్ధార్థ్ తన తుపాకీని శుభ్రం చేస్తుండగా అది అనుకోకుండా పేలిపోయింది. ఈ ప్రమాదంలో ఆయన అక్కడికక్కడే మృతి చెందారు. కొత్తగా పెళ్లైన యువతి జీవితంలో ఈ ఘటన పిడుగుపాటులా మారింది. పెళ్లి వేడుక సందడి ముగియకముందే భర్తను కోల్పోవడంతో లీనా పూర్తిగా కుంగిపోయారు. చాలామంది ఆమెను "దురదృష్టవంతురాలు", "అపశకునం" అంటూ నిందించారు. దీంతో తీవ్ర మానసిక వేదనకు గురైన లీనా తిరిగి తన పుట్టింటికి వెళ్లిపోయారు.
ఇక కొంతకాలం తర్వాత బాధను మరచిపోవాలని భావించిన లీనా తిరిగి సినిమాల్లోకి వచ్చారు. అయితే అప్పటికే ఆమె జీవితంలో జరిగిన విషాదం ఆమెను మానసికంగా బలహీనపరిచింది. ఆమె నటించిన కొన్ని సినిమాలు ఆశించిన స్థాయిలో విజయం సాధించలేదు. ముఖ్యంగా 'బైరాగ్' చిత్రం నిరాశపరిచింది. అలాంటి సమయంలోనే ఆమె జీవితంలో మరో వ్యక్తి ప్రవేశించాడు. అతడే బాలీవుడ్ లెజెండరీ సింగర్, నటుడు కిషోర్ కుమార్.
కిషోర్ కుమార్ అప్పటికే బాలీవుడ్లో దిగ్గజ గాయకుడు. అయితే వ్యక్తిగత జీవితంలో ఎన్నో ఒడిదుడుకులు ఎదుర్కొన్నారు. ఆయనకు అప్పటికే మూడు వివాహాలు విఫలమయ్యాయి. అంతేకాకుండా ఆయన వయసు లీనా కంటే దాదాపు 20 ఏళ్లు ఎక్కువ. ఈ ప్రేమను కిషోర్ కుమార్ కుటుంబ సభ్యులు కూడా వ్యతిరేకించినట్లు అప్పట్లో వార్తలు వచ్చాయి. కానీ ప్రేమ ముందు అన్ని అడ్డంకులు చిన్నవే అయ్యాయి. చివరికి ఇద్దరూ వివాహం చేసుకున్నారు. జీవితంలో రెండోసారి లీనా సంతోషాన్ని పొందినట్లు కనిపించింది. కానీ దురదృష్టం మాత్రం లీనాను వదల్లేదు. వివాహం జరిగిన ఏడేళ్లు కూడా పూర్తికాకముందే కిషోర్ కుమార్ గుండెపోటుతో కన్నుమూశారు. రెండోసారి కూడా తన జీవిత భాగస్వామిని కోల్పోవాల్సి రావడంతో లీనా పూర్తిగా ఒంటరిగా మిగిలిపోయారు.
Click it and Unblock the Notifications
Sign in with Google