ఇదే ప్రశ్న మహేష్ బాబును అడిగే దమ్ముందా..?
నటి మంచు లక్ష్మి కేవలం మోహన్బాబు కుమార్తెగా మాత్రమే కాకుండా, నటిగా, నిర్మాతగా, సామాజిక కార్యకర్తగా తనకంటూ ఒక ప్రత్యేక స్థానాన్ని సంపాదించుకున్నారు. ఆమె మాట్లాడే విధానంపై సోషల్ మీడియాలో ట్రోలింగ్ జరిగినా, ఆమె తన ఆలోచనలను నిర్భయంగా పంచుకుంటారు. తాజాగా ఆమె ఇచ్చిన ఒక ఇంటర్వ్యూలో ఓ యాంకర్ అడిగిన ప్రశ్నకు ఆమె ఇచ్చిన ధీటైన సమాధానం ఇప్పుడు వైరల్ అవుతోంది.
'50 ఏళ్లకు దగ్గరవుతున్న మీరు ఇలాంటి డ్రెస్సులు ఎందుకు వేసుకుంటున్నారు?' అని యాంకర్ అడిగిన ప్రశ్నకు, మంచు లక్ష్మి తీవ్రంగా స్పందించారు. "ఇదే ప్రశ్న మీరు ఒక మగాడిని అడగగలరా? మహేశ్బాబుకు 50 ఏళ్లొచ్చాయి, ఆయన షర్ట్ విప్పి ఎందుకు తిరుగుతున్నారు అని అడుగుతారా?" అంటూ ఆమె ఎదురు ప్రశ్నించారు. ఇది కేవలం తన వ్యక్తిగత అభిప్రాయం మాత్రమే కాదని, సమాజంలో మహిళలపై ఉన్న వివక్షను కూడా ఆమె ప్రశ్నించారు.
ఒక మహిళ వేసుకునే దుస్తుల గురించి మాట్లాడటం, ఆమె వయసు ఆధారంగా అంచనా వేయడం సరైంది కాదని ఆమె బలంగా నమ్మారు. ఆమె మాట్లాడుతూ, ఒక నటి విడాకులు తీసుకుంటే ఇండస్ట్రీలో పక్కన పెడతారని, అదే ఒక మగాడు విడాకులు తీసుకుంటే అతడికి ఎలాంటి ఇబ్బందులు ఉండవని ఆమె ఆవేదన వ్యక్తం చేశారు. మహిళలకు పెళ్లి తర్వాత భర్త, పిల్లలు, అత్తమామల బాధ్యతలతో స్వేచ్ఛ చాలా తక్కువ ఉంటుందని, అలాంటిది కనీసం దుస్తుల విషయంలో కూడా స్వేచ్ఛ లేదా అని ఆమె ప్రశ్నించారు.
మంచు లక్ష్మి ఇచ్చిన ఈ సమాధానంపై నెటిజన్లు, అభిమానులు పెద్ద ఎత్తున స్పందిస్తున్నారు. సినిమా ప్రమోషన్లలో దుస్తుల గురించి కాకుండా, ఆమె నటించిన సినిమా గురించి అడగాలని చాలామంది అభిప్రాయపడుతున్నారు. మహిళల హక్కులు, సమానత్వం వంటి అంశాలపై ఆమె నిర్భయంగా మాట్లాడిన తీరు చాలామందికి స్ఫూర్తినిచ్చింది. ఈ సంఘటన మంచు లక్ష్మికి మరింత గౌరవాన్ని తెచ్చిపెట్టింది.
Click it and Unblock the Notifications
Sign in with Google