ఆ స్టార్ హీరో వల్లే ప్రియుడితో బ్రేకప్.. మృణాల్ లవ్ స్టోరీలో షాకింగ్ ట్విస్ట్!

టాలీవుడ్, బాలీవుడ్ ప్రేక్షకులకు సుపరిచితమైన నటి మృణాల్ ఠాకూర్ ప్రస్తుతం తన కెరీర్లో దూసుకెళ్తున్నారు.సిద్ధాంత్ చతుర్వేదితో కలిసి మృణాల్ నటించిన 'దో దీవానే షెహర్ మే' చిత్రం విడుదలకు సిద్ధంగా ఉంది. ఈ సినిమా ప్రమోషన్లలో భాగంగా మృణాల్ తన వ్యక్తిగత జీవితం గురించి కొన్ని ఆసక్తికరమైన విషయాలను పంచుకున్నారు. ముఖ్యంగా ఒక మాజీ ప్రియుడి అభద్రతా భావం, అసూయ తనను ఎలా ఇబ్బంది పెట్టాయో ఆమె వివరించారు.

హృతిక్ రోషన్ అందం.. ప్రియుడిలో ఆందోళన
మృణాల్ వెల్లడించిన దాని ప్రకారం.. 2019లో ఆమె హృతిక్ రోషన్ సరసన 'సూపర్ 30' సినిమాలో నటిస్తున్న సమయంలో ఈ సమస్య తలెత్తింది. ప్రపంచంలోనే అత్యంత అందమైన నటుల్లో ఒకరైన హృతిక్‌తో మృణాల్ స్క్రీన్ షేర్ చేసుకోవడం ఆమె ప్రియుడికి అస్సలు నచ్చలేదు. హృతిక్ లుక్స్‌తో తనను తాను పోల్చుకుంటూ ఆ ప్రియుడు తీవ్రమైన ఇన్సెక్యూరిటీకి లోనయ్యాడని మృణాల్ తెలిపారు. గ్లామర్ ఫీల్డ్‌లో అందమైన నటులతో పని చేయాల్సి వచ్చినప్పుడు భాగస్వామికి ఉండాల్సిన కనీస అవగాహన అతడిలో లేకపోవడం ఆ బంధంలో చీలిక తెచ్చిందని ఆమె పేర్కొన్నారు.

బరువు తగ్గడం.. పెరగడం.. అంతా మానసిక ఒత్తిడే!
హృతిక్ రోషన్ రేంజ్‌లో తాను కూడా కనిపించాలనే తాపత్రయంతో ఆ ప్రియుడు తన శరీరాన్ని కఠినమైన శిక్షకు గురిచేశాడట. ప్రతి రోజూ జిమ్ కు వెళ్లి వర్కౌట్లు చేసేవాడట. హృతిక్‌కు పోటీగా ఉండాలని అతి తక్కువ కాలంలో సుమారు 17 కిలోల బరువు తగ్గాడు. అయితే ఈ ప్రక్రియలో అతడు శారీరక శక్తిని కోల్పోవడమే కాకుండా తీవ్రమైన మానసిక అలసటకు గురయ్యాడు. ఆ ఒత్తిడిని తట్టుకోలేక వ్యాయామం పూర్తిగా మానేయడంతో, మళ్లీ సుమారు 20 కిలోల బరువు పెరిగాడని మృణాల్ ఠాకూర్ వెల్లడించింది. తాను ఎప్పుడూ అతడిని మార్చుకోమని చెప్పలేదని, కేవలం అసూయ వల్లే అతడు ఇదంతా చేసుకున్నాడని ఆమె స్పష్టం చేసింది.

ఎవరా మిస్టరీ మ్యాన్?
మృణాల్ తన మాజీ ప్రియుడి పేరును గోప్యంగా ఉంచినప్పటికీ.. అతను ఒక స్కాండినేవియన్ (Scandinavian) వ్యక్తి అని మాత్రం క్లూ ఇచ్చారు. గతంలో మృణాల్ పేరు రచయిత శరద్ త్రిపాఠి, ర్యాపర్ బాద్షాతో వినిపించినప్పటికీ, తాజా సంఘటనకు వారికి ఎలాంటి సంబంధం లేదని ఆమె మాటలను బట్టి అర్థమవుతోంది. కేవలం తన వృత్తిని, తన సహనటులను చూసి అసూయపడే వ్యక్తితో బంధాన్ని కొనసాగించడం ఇష్టం లేకే ఆమె విడిపోయినట్లు తెలుస్తోంది.

నెటిజన్ల భిన్న స్పందనలు
మృణాల్ చేసిన ఈ కామెంట్స్ ఇప్పుడు సోషల్ మీడియాలో చర్చకు దారితీశాయి. కొందరు నెటిజన్లు ఆమె నిజాయితీని మెచ్చుకుంటూ.. ఇలాంటి టాక్సిక్ రిలేషన్స్ నుండి బయటకు రావడం మంచిదని మద్దతు తెలుపుతున్నారు. అయితే మరికొందరు మాత్రం, సినిమా ప్రమోషన్ల కోసం పాత వ్యక్తిగత విషయాలను, ఒక వ్యక్తి బలహీనతలను ఇలా బయటపెట్టడం సరికాదని విమర్శిస్తున్నారు. ఏదేమైనా, మృణాల్ తన కొత్త సినిమా విడుదలకు ముందు ఇలాంటి సంచలన కామెంట్లతో వార్తల్లో నిలిచారు.

English summary

Mrunal Thakur opens up about her toxic relationship with an ex-boyfriend who was insecure of her co-star Hrithik Roshan. Read more about her shocking reveal here.