ఓటీటీలోకి తమన్నా రొమాంటిక్ మూవీ.. స్ట్రీమింగ్ ఎక్కడంటే..?

బాలీవుడ్ స్టార్ హీరో షాహిద్ కపూర్ కు సరైన హిట్ పడి చాలా ఏళ్లే అయింది. 2019లో విడుదలైన కబీర్ సింగ్ మూవీ బ్లాక్ బస్టర్ విజయం సాధించిన విషయం తెలిసిందే. ఈ మూవీ తర్వాత షాహిద్ కపూర్ కు మళ్లీ ఆ రేంజ్ మూవీ రాలేదనే చెప్పాలి. అయితే ఇటీవల షాహిద్ కపూర్ నుంచి వచ్చిన ఓ రోమియో మూవీ బాక్సాఫీస్ వద్ద పాజిటివ్ టాక్ తో దూసుకెళ్తోంది. వాలంటైన్స్ డే సందర్భంగా ఈ మూవీ ఫిబ్రవరి 13 న విడుదలైంది. 10 రోజుల్లో రూ. 150 కోట్ల వరకు కలెక్షన్స్ రాబట్టింది.

ఓ రోమియో సినిమాను ప్రముఖ దర్శకుడు విశాల్ భరద్వాజ్ తెరకెక్కించారు. ఈ సినిమాలో తమన్నా భాటియా, అవినాష్ తివారీ, నానా పటేకర్, దిశా పటానీ, విక్రాంత్ మాసే వంటి భారీ తారాగణం ఉంది. ముంబై గ్యాంగ్‌ స్టర్ హుస్సేన్ ఉస్తారా జీవితం ఆధారంగా ఈ మూవీని రూపొందించినట్లు తెలుస్తోంది. జర్నలిస్ట్ హుస్సేన్ జైదీ రాసిన 'మాఫియా క్వీన్స్ ఆఫ్ ముంబై' పుస్తకంలోని ఒక అధ్యాయం ఆధారంగా ఓ రోమియో సినిమాను తెరకెక్కించినట్లు సమాచారం. రూ. 125 నుంచి 150 కోట్ల బడ్జెట్ తో ఈ ఓ రోమియో సినిమాను తీసినట్లు తెలుస్తోంది. అయితే 10 రోజుల్లో ఈ మూవీ రూ. 150 కోట్ల దిశగా సాగుతోంది. ఫుల్ రన్ లో బయ్యర్స్ కు లాభాల పంట అని సినీ విశ్లేషకులు అంచనా వేస్తున్నారు.

ఈ సినిమాలో షాహిద్ కపూర్ నటనకు ప్రశంసలు దక్కుతున్నాయి. ఓ రోమియో మూవీలో సినిమాటోగ్రఫీ, సంగీతం అద్భుతంగా ఉన్నాయని ప్రేక్షకులు ప్రశంసిస్తున్నారు. అయితే.. ఈ మూవీలో స్క్రీన్‌ ప్లే మైనస్ అని సమాచారం. అలాగే కథనం కూడా ఊహకు అందే విధంగా ఉండటం వల్ల ఓ రోమియో సినిమాకు అక్కడక్కడా కలెక్షన్స్ తగ్గినట్లు తెలుస్తోంది. ఇక ప్రముఖ డిజిటల్ స్ట్రీమింగ్ ప్లాట్‌ ఫామ్ అమెజాన్ ప్రైమ్ వీడియో ఓ రోమియో ఓటీటీ రైట్స్‌ ను సొంతం చేసుకుంది. అయితే తాజాగా వస్తున్న సమాచారం ప్రకారం.. ఓ రోమియో మూవీ ఏప్రిల్ రెండో వారంలో ఓటీటీ స్ట్రీమింగ్ కానుంది.

ఇక దర్శకుడు విశాల్ భరద్వాజ్, షాహిద్ కపూర్ కాంబినేషన్‌ లో వచ్చిన నాలుగో సినిమా ఓ రోమియో కావడం విశేషం. ఇదివరకు వీరి కాంబోలో కమీనే (2009), హైదర్ (2014), రంగూన్ (2017) వంటి విభిన్నమైన సినిమాలు చేశారు. అయితే కబీర్ సింగ్ తర్వాత ఆ రేంజ్ హిట్ కోసం ఎదురుచూసిన షాహిద్ కపూర్ కు ఈ మూవీ కాస్త ఊరటనిచ్చిందనే చెప్పాలి.