చిన్మయిపై నెటిజన్ నీచమైన కామెంట్.. దిమ్మతిరిగే కౌంటర్ ఇచ్చిన సింగర్!

సోషల్ మీడియా వేదికగా సామాజిక అంశాలపై నిలదీయడంలో గాయని చిన్మయి శ్రీపాద ఎప్పుడూ ముందుంటారు. అయితే, ఆమె చేసే పోస్టులపై కొందరు నెటిజన్లు ప్రశంసలు కురిపిస్తే, మరికొందరు అత్యంత హేయమైన రీతిలో స్పందిస్తుంటారు. తాజాగా జరిగిన ఒక ఘటన సభ్య సమాజం తలదించుకునేలా ఉండటమే కాకుండా, చిన్మయి ఇచ్చిన ధీటైన సమాధానం ఇప్పుడు నెట్టింట చర్చనీయాంశంగా మారింది. ప్రపంచవ్యాప్తంగా సంచలనం సృష్టించిన ఎప్ స్టీన్ సెక్స్ కుంభకోణం నేపథ్యంలో చిన్మయి సోషల్ మీడియాలో ఒక పోస్ట్ చేశారు. మన చుట్టూ ఉన్న సమాజంలో పొంచి ఉన్న ప్రమాదాలను ఆమె హెచ్చరించారు.

ప్రతి భవనంలోనూ ఒక ఎప్ స్టీన్ ఉంటాడు.మత పెద్దలను సైతం గుడ్డిగా నమ్మకండి.భారతదేశంలో లక్షలాది మంది బాల లైంగిక నేరస్థులు ఉన్నారు. ఏ అమ్మాయినైనా అడగండి.. ఆమె చిన్నతనంలో ఎదుర్కొన్న వేధింపుల గురించి చెబుతుంది.సమాజంలోని ఈ చేదు నిజాన్ని బయటపెట్టిన చిన్మయి వ్యాఖ్యలపై ఒక నెటిజన్ మానవత్వం మరిచి, విచక్షణ కోల్పోయి అత్యంత దారుణంగా కామెంట్ చేశాడు.

ఆ నెటిజన్ స్పందిస్తూ.. నీ తండ్రే నిన్ను రేప్ చేసి ఉంటాడు.. అందుకే ఇలా మాట్లాడుతున్నావు అంటూ ఒక మహిళ అని కూడా చూడకుండా నీచమైన వ్యాఖ్యలు చేశాడు. ఈ వ్యాఖ్యలు ఎవరికైనా ఒళ్లు గగుర్పు పొడిచేలా ఉన్నాయి. అయితే, చిన్మయి అస్సలు తగ్గలేదు. అతడికి బుద్ధి వచ్చేలా, సమాజానికి అర్థమయ్యేలా గట్టిగా బదులిచ్చారు.

నా తండ్రి నన్ను అలా చేయలేదు. కానీ, తండ్రులే కూతుళ్లపై అత్యాచారం చేస్తారని మీరు ఊహిస్తున్నారంటే.. మీరు పెరిగిన వాతావరణం, మీ సంస్కృతి ఏంటో అర్థమవుతోంది. మిమ్మల్ని పెంచిన విధానమే మీ ప్రవర్తనలో కనిపిస్తోంది. చిన్మయి ఇచ్చిన ఈ సమాధానం ఆ నెటిజన్ నోరు మూయించడమే కాకుండా, విమర్శించే వారి ఆలోచనా దృక్పథం ఎంత దిగజారిపోయిందో ఎండగట్టింది.

చిన్మయి పోస్ట్‌కు ప్రస్తుతం సోషల్ మీడియాలో విశేష స్పందన లభిస్తోంది. ఒక సెలబ్రిటీని, ముఖ్యంగా ఒక మహిళను ఉద్దేశించి అంత దారుణమైన వ్యాఖ్యలు చేసిన వ్యక్తిపై కఠిన చర్యలు తీసుకోవాలని అందరూ డిమాండ్ చేస్తున్నారు.ఎన్ని వ్యక్తిగత విమర్శలు ఎదురైనా, బెదిరింపులు వచ్చినా చిన్మయి తన గొంతును నొక్కేయకుండా సామాజిక అన్యాయాలపై పోరాడటం విశేషం. ఒక వ్యక్తి చేసే కామెంట్ అతడి వ్యక్తిత్వాన్ని మాత్రమే కాదు, అతడు పెరిగిన నేపథ్యాన్ని కూడా ప్రతిబింబిస్తుందని చిన్మయి చెప్పిన మాటలు అందరినీ ఆలోచింపజేస్తున్నాయి.

English summary

Singer Chinmayi Sripada gives a fitting reply to a netizen who made a disgusting personal comment on her post about child abusers and the Epstein scandal.