విజయ్ దేవరకొండ: ఫిల్మ్ స్టార్ నుంచి తెలంగాణ రాజకీయాల వైపు?
టాలీవుడ్‌లో తనకంటూ ఓ ప్రత్యేకమైన శైలిని, క్రేజ్‌ను సంపాదించుకున్న నటుడు విజయ్ దేవరకొండ ఇటీవలి కాలంలో వేస్తున్న అడుగులు రాజకీయ వర్గాల్లో తీవ్ర చర్చనీయాంశమవుతున్నాయి. తమిళనాడుకు చెందిన మాజీ ఐపీఎస్ అధికారి, పొలిటికల్ లీడర్ కె.అన్నామలైతో ఆయన భేటీ కావడం, చారిత్రక కథాంశాల పట్ల ఆసక్తి చూపడం, తన సొంత ఫౌండేషన్ ద్వారా సేవా కార్యక్రమాలను విస్తరించడం వంటి పరిణామాలు కేవలం సినిమా రంగానికి పరిమితం కాలేదు. ఆయన ఓ నటుడిగా మాత్రమే కాకుండా సమాజంలో ఓ బలమైన ప్రజా ప్రతిబింబాన్ని నిర్మించుకునే వ్యూహాత్మక ఆలోచనలో ఉన్నారనే ఊహాగానాలు జోరందుకున్నాయి.
తెలుగు రాష్ట్రాల్లో సినీ రంగానికి, రాజకీయాలకు మధ్య దశాబ్ధాల కాలంగా విడదీయరాని బంధం ఉంది. ఉమ్మడి ఆంధ్రప్రదేశ్ చరిత్రను తిరగరాస్తూ దివంగత ఎన్టీ రామారావు సొంత పార్టీ స్థాపించి అతి తక్కువ కాలంలోనే ముఖ్యమంత్రి పీఠాన్ని అధిరోహించారు. ఇటీవల ఏపీ రాజకీయాల్లో పవన్ కళ్యాణ్ ఉప ముఖ్యమంత్రి పదవిని చేపట్టడం కూడా, పక్కా ప్రణాళికస ప్రజాదరణ తోడైతే సినీ గ్లామర్ రాజకీయ అధికారంగా ఎలా మారగలదో స్పష్టం చేసింది.ఈ నేపథ్యంలో విజయ్ దేవరకొండ తెలంగాణలో కూడా సరిగ్గా అలాంటి మార్గాన్నే ఎంచుకుంటున్నారా అనే సందేహాలు విశ్లేశకుల్లో వ్యక్తమవుతున్నాయి.
విజయ్ ప్రస్తుతం చేపడుతున్న కార్యకలాపాలను విడివిడిగా చూస్తే సాధారణంగానే అనిపిస్తాయి. ఓ చారిత్రక నేపథ్యంలో వచ్చే సినిమా చేయడం ద్వారా సాంస్కృతిక వారసత్వానికి, గుర్తింపునకు ప్రాతినిధ్యం వహించవచ్చు. రాజకీయ నాయకులతో సమావేశాలు విజయ్ దేవరకొండకు విస్తృతమైన ప్రజాదరణను తెచ్చిపెడతాయి. ఇక ఫౌండేషన్ ద్వారా సామాజిక కార్యక్రమాలు చేపట్టడం సినిమా అభిమానులతోనే కాకుండా సాధారణ ప్రజలతో కూడా నేరుగా భావోద్వేగ అనుబంధాన్ని ఏర్పరుస్తుంది. అయితే ఈ అంశాలన్నింటినీ కలిపి పరిశీలిస్తే.. ఆయన తన ప్రజాదరణణను ఓ స్పష్టమైన లక్ష్యంతో పెంచుకుంటున్నాడనే అభిప్రాయం బలంగా వినిపిస్తోంది.
తమిళనాడు రాజకీయాల్లో నటుడు విజయ్ సొంత పార్టీ పెట్టి సరికొత్త రాజకీయ గుర్తింపును సాధించినట్లే.. విజయ్ దేవరకొండ కూడా తన స్టార్ పవర్ ను రాజకీయంగా మార్చుకోగలరా అనేది ఇప్పుడు ప్రధాన ప్రశ్నగా మారింది. తెలంగాణలో ఇప్పటికే బీఆర్ఎస్, కాంగ్రెస్, బీజేపీ వంటి స్థిరపడిన బలమైన రాజకీయ శక్తులు ఉన్నాయి. కేవలం అభిమానుల మద్దతు, గ్లామర్ మాత్రమే క్షేత్రస్థాయి సంస్థాగత బలాన్ని భర్తీ చేయలేవనేది వాస్తవం. అయినప్పటికీ యువతలో మంచి ఫాలోయింగ్, సోషల్ మీడియా ప్రాబల్ం ఉన్న ఓ పాపులర్ సెలబ్రిటీ ప్రత్యక్ష రాజకీయాల్లోకి అడుగుపెడితే అది ఖచ్చితంగా పెద్ద సంచలనానికే దారితీస్తుంది.
ప్రస్తుతానికైతే విజయ్ దేవరకొండ ఎలాంటి రాజకీయ ప్రకటనలు చేయలేదు లేదా ఏ పార్టీ వైపు మొగ్గు చూపుతున్నట్లు స్పష్టం చేయలేదు. అయినప్పటికీ ఆయన చుట్టూ జరుగుతున్న చర్చలు ఇకపై కేవలం తదుపరి సినిమా రిలీజ్‌లు లేదా బాక్సాఫీస్ కలెక్షన్లకే పరిమితం కావడం లేదు. వెండితెరపై హీరోగా మెప్పించిన ఈ యంగ్ స్టార్ భవిష్యత్తులో నిజ జీవితంలో కూడా ప్రజా నాయకుడిగా మారి రాజకీయం వైపు అడుగులు వేస్తాడా లేదా అనేది కాలమే నిర్ణయించాలి.
Click it and Unblock the Notifications
Sign in with Google
