యూట్యూబ్లో దుమ్మురేపుతున్న తెలంగాణ ఫోక్ సాంగ్..
ప్రస్తుతం ఎక్కడ చూసిన తెలంగాణ పల్లెపాటల హవా నడుస్తోంది. ఒకప్పుడు సినిమాల్లో మాత్రమే వినిపించే జానపద బాణీలు ఇప్పుడు స్వతంత్ర ఫోక్ సాంగ్స్ రూపంలో నెట్టింట సంచలనాలు సృష్టిస్తున్నాయి. గ్రామీణ భాష, పల్లెటూరి ముచ్చట్లు, మాస్ బీట్స్, కట్టిపడేసే డ్యాన్స్లతో వస్తున్న ఈ పాటలు ప్రేక్షకులను విపరీతంగా ఆకట్టుకుంటున్నాయి. ముఖ్యంగా తెలంగాణ యాసలో వచ్చే పాటలకు యువత నుంచి భారీ స్పందన పొందుతూ యూట్యూబ్ ప్రపంచాన్ని ఊపేస్తోంది.
సినిమా పాటలతో పోటీగా యూట్యూబ్లో మిలియన్ల వ్యూస్ సాధిస్తున్న ఈ ఫోక్ సాంగ్స్ ఇప్పుడు సోషల్ మీడియా ట్రెండ్ను పూర్తిగా మార్చేశాయి. ఇన్స్టాగ్రామ్ రీల్స్, యూట్యూబ్ షార్ట్స్, ఫేస్బుక్ వీడియోలు.. ఎక్కడ చూసినా తెలంగాణ ఫోక్ బీట్లే వినిపిస్తున్నాయి. ఇప్పుడు అదే బాటలో మరో పల్లె పాట ఫుల్ ట్రెండింగ్ గా మారింది. విడుదలైన కొద్ది రోజుల్లోనే ఈ పాట లక్షలాది వ్యూస్ దక్కించుకుని యూట్యూబ్ లో దూసుకుపోతోంది.
ఏం పాట అంటే..
"సన్న సన్న బియ్యమే మదానో నా వయ్యారి.. సరువల్ల వంటలే మదానో నా వయ్యారి" అంటూ సాగే ఈ పాట వినగానే కాలు ఆగకుండా స్టెప్పులేయాలనిపించేలా ఉంది. మాస్ బీట్, క్యాచీ ట్యూన్, సింపుల్ లిరిక్స్ ఈ పాటను మరింత ప్రత్యేకంగా నిలబెట్టాయి. ఈ పాటలో మాధురి రాథోడ్, ఈశ్వర్ సాయి తమ ఎనర్జిటిక్ డ్యాన్స్తో ప్రేక్షకులను కట్టిపడేశారు. ఇద్దరి కెమిస్ట్రీ, పల్లెటూరి స్టైల్ ఎక్స్ప్రెషన్స్, స్టెప్పులు యువతను బాగా ఆకర్షిస్తున్నాయి.
ప్రత్యేకంగా గ్రామీణ వాతావరణంలో చిత్రీకరించిన సన్నివేశాలు పాటకు మరింత సహజత్వాన్ని తీసుకొచ్చాయి. బావా-మరదళ్ల మధ్య జరిగే సరదా మాటలు, స్థానిక యాసలో వచ్చే డైలాగ్ తరహా లిరిక్స్ ప్రేక్షకులను బాగా కనెక్ట్ అవుతున్నాయి. ఈ పాటను శిరీష, గంగమణి ఆలపించారు. తెలంగాణ జానపద శైలిని కాపాడుతూ, మాస్ ఆడియన్స్కు నచ్చేలా పాడిన తీరు ప్రస్తుతం సంగీత ప్రియులను ఆకట్టుకుంటోంది. పాటలో వినిపించే స్థానిక పదాలు, పల్లెటూరి ఉచ్చారణ, సహజమైన గానం పాటను మరింత దగ్గర చేసింది. అందుకే ఈ పాట గ్రామాల్లో మాత్రమే కాదు.. పట్టణాల్లోనూ మారుమోగుతోంది.
రీల్స్లో ట్రెండింగ్..
"సన్న సన్న బియ్యమే" ప్రస్తుతం ఇన్స్టాగ్రామ్ రీల్స్, యూట్యూబ్ షార్ట్స్లో భారీగా వినిపిస్తోంది. చిన్నారుల నుంచి యువత వరకు ఈ పాటకు డ్యాన్స్ వీడియోలు చేస్తూ సోషల్ మీడియాలో షేర్ చేస్తున్నారు. ముఖ్యంగా డీజే ప్రోగ్రామ్స్, ఫంక్షన్లు, కళాశాల వేడుకల్లో ఈ పాటకు మంచి క్రేజ్ ఏర్పడింది. పెళ్లిళ్లు, గ్రామోత్సవాలు, బతుకమ్మ వేడుకలు, జాతరల్లో కూడా ఈ పాట బీట్ వినిపిస్తోందంటే దాని పాపులారిటీ ఏ స్థాయిలో ఉందో అర్థం చేసుకోవచ్చు.
ఇక ఇటీవలి కాలంలో తెలంగాణ ఫోక్ సాంగ్స్కు విపరీతమైన ఆదరణ లభిస్తోంది. పల్లెటూరి సంస్కృతి, స్థానిక భాష, జానపద బాణీలను ఆధునిక సంగీతంతో మేళవిస్తూ కొత్త తరహా ఫోక్ పాటలు వస్తున్నాయి. దీంతో యువత కూడా ఈ పాటలను విపరీతంగా ఆదరిస్తోంది. ఒకప్పుడు గ్రామాలకు మాత్రమే పరిమితమైన జానపద గీతాలు ఇప్పుడు ప్రపంచవ్యాప్తంగా తెలుగు ప్రేక్షకులను అలరిస్తున్నాయి. ముఖ్యంగా యూట్యూబ్ వంటి వేదికలు గ్రామీణ ప్రతిభకు పెద్ద అవకాశంగా మారాయి.
Click it and Unblock the Notifications
Sign in with Google