బాక్సాఫీస్ వద్ద ఇంత దరిద్రమైన సినిమా రాదు..రాబోదు

ఇటీవలి కాలంలో భారతీయ సినిమా పరిశ్రమ అగ్రస్థానంలో దూసుకుపోతోంది. అంతర్జాతీయ స్థాయిలో పేరు తెచ్చుకుంటోంది. అయితే, భారీ బడ్జెట్‌తో నిర్మించిన సినిమాలు అంచనాలను అందుకోలేక, నిర్మాతలకు తీవ్ర నష్టాలను మిగిల్చడం కొత్తేమీ కాదు. ఇటీవల కమల్ హాసన్ నటించిన 'భారతీయుడు 2', సూర్య 'కంగువా', రామ్ చరణ్ 'గేమ్ ఛేంజర్', అక్షయ్ కుమార్ 'బడే మియా చోటే మియా', పవన్ కల్యాణ్ నటించిన 'హరిహర వీరమల్లు', ఎన్టీఆర్ 'వార్-2' వంటి సినిమాలు భారీ బడ్జెట్‌తో నిర్మించినా బాక్సాఫీస్ వద్ద పరాజయం పాలయ్యాయి. ఈ సినిమాలు నిర్మాతలకు వందల కోట్ల రూపాయల నష్టాలను మిగిల్చాయి.

అలాగే ఈ జాబితాలోకి మరో సినిమాను కూడా చేర్చాలి. ఆ సినిమానే 'గణపత్: ఎ హీరో ఈజ్ బోర్న్' 'క్వీన్', 'సూపర్ 30' లాంటి అద్భుతాలు సృష్టించిన వికాస్ బహల్‌కు అలాంటి కలల ప్రాజెక్టే 'గణపత్: ఎ హీరో ఈజ్ బోర్న్'. హాలీవుడ్ స్థాయి యాక్షన్, సైన్స్ ఫిక్షన్ అంశాలతో ఒక ప్యాన్-ఇండియా 'మైల్‌స్టోన్' సృష్టించాలని ఆయన సంకల్పించారు. కానీ, ఈ కలల చిత్రం 2023లో బాలీవుడ్‌ను కుదిపేసిన అతిపెద్ద ఆర్థిక విపత్తుగా చరిత్రలో నిలిచిపోయింది.

బాలీవుడ్ యాక్షన్ స్టార్ టైగర్ ష్రాఫ్ , గ్లామర్ కృతి సనన్, దిగ్గజ నటుడు అమితాబ్ బచ్చన్ వంటి స్టార్ కాస్ట్‌తో దాదాపు రూ.170 కోట్ల నుండి రూ. 200 కోట్ల భారీ బడ్జెట్తో ఈ సినిమాను లండన్, లడఖ్ లాంటి అద్భుతమైన లొకేషన్లలో చిత్రీకరించారు. నిర్మాతలు జాకీ, వాషు భగ్నాని (పూజా ఎంటర్‌టైన్‌మెంట్) ఈ ప్రాజెక్ట్‌పై ఎన్నో ఆశలు పెట్టుకున్నారు. కానీ, విడుదలయ్యాక పరిస్థితి పూర్తిగా తారుమారైంది. మొదటి రోజు కేవలం రూ.2.5 కోట్లు మాత్రమే వసూలు చేసింది. ప్రపంచవ్యాప్తంగా వచ్చిన మొత్తం కలెక్షన్ రూ.14 కోట్లు దాటలేదు.

ఈ సినిమా పరాజయం టైగర్ ష్రాఫ్ కెరీర్‌కు పెద్ద ఎదురుదెబ్బగా మారింది. ఈ ఫెయిల్యూర్ వెనుక ఉన్న అత్యంత ఆశ్చర్యకరమైన విషయం దర్శకుడు వికాస్ బహల్ చేసిన ఓపెన్ కామెంట్స్. తన డ్రీమ్ ప్రాజెక్ట్‌కు జరిగిన అన్యాయాన్ని ఆయనే స్వయంగా అంగీకరించారు."గణపత్ నా డ్రీమ్ ప్రాజెక్ట్ అయినప్పటికీ, షూటింగ్ సమయంలో నేను నా డైరెక్షన్ ట్రాక్‌ను కోల్పోయాను. ఏం క్రియేట్ చేస్తున్నాననే కన్ఫ్యూజన్‌లో పడిపోయాను. నిజం చెప్పాలంటే, చివరికి ఆ సినిమా ఎందుకు తీశానో నాకే తెలియదు."

ఒక దర్శకుడు తన సొంత చిత్రం గురించి ఇలాంటి బహిరంగ ప్రకటన చేయడం, సినిమా కథనం ఎంత గందరగోళంగా, బలహీనంగా ఉందో చెప్పడానికి నిదర్శనం. కన్ఫ్యూజ్ చేసే స్క్రీన్‌ప్లే, బోరింగ్ యాక్షన్ సీక్వెన్స్‌లు ప్రేక్షకులను థియేటర్‌లకు దూరం చేశాయి.

'గణపత్' వైఫల్యం కేవలం విమర్శలకే పరిమితం కాలేదు, ఇది నిర్మాతలను ఊహించని ఆర్థిక సంక్షోభంలోకి నెట్టింది. ఈ సినిమా నష్టాల నుండి తేరుకోకముందే, భగ్నాని కుటుంబం యొక్క మరో భారీ బడ్జెట్ చిత్రం 'బడే మియాన్ చోటే మియాన్' (బడ్జెట్ రూ. 350 కోట్లు) కూడా బాక్సాఫీస్ వద్ద పరాజయం పాలైంది. రెండు వరుస భారీ ఫ్లాప్‌లతో, 'కూలీ నంబర్ 1' వంటి హిట్‌లు ఇచ్చిన ప్రతిష్టాత్మక పూజా ఎంటర్‌టైన్‌మెంట్ సంస్థ దాదాపు రూ. 250 కోట్ల అప్పుల్లో కూరుకుపోయినట్లు సమాచారం.

ఒకటి లేదా రెండు సినిమాలు ఒక నిర్మాణ సంస్థ ఆర్థిక సామర్థ్యాన్ని ఎంతలా కుంగదీయగలవో చెప్పడానికి 'గణపత్' ఒక విషాదకరమైన ఉదాహరణ. సినిమా ఇండస్ట్రీలో భారీ కలలతో మొదలైన ప్రతి ప్రాజెక్ట్ విజయవంతం కాకపోవచ్చు, కొన్నిసార్లు అది అత్యంత చేదు అనుభవాలను, ఆర్థిక విపత్తులను మిగులుస్తుందని ఈ 'గణపత్' కథ నిరూపించింది.

English summary

Analysis of the Ganapath movie disaster: Why the ₹200 Cr film failed at the box office. Director Vikas Bahl's candid confession and how two consecutive flops led to a ₹250 Cr debt for Pooja Entertainment.