అతను తెలుగు కుర్రాడే

ఐపియల్ 4లో స్టార్ క్రికెటర్ల మన్ననలు పొందుతున్న పాల్ వాల్తాటీ తెలుగు కుర్రాడే. కింగ్స్ ఎలెవన్ పంజాబ్ తరఫున ఆడుతున్న పాల్ వాల్తాటీకి గత చరిత్ర పెద్దగా లేదు. అప్పటికి అతను కేవలం ఒక్క ఫస్ట్ క్లాస్ మ్యాచు మాత్రమే ఆడాడు. చూపులకు సాదాసీదాగా కనిపించే 27 పాల్ వాల్తాటీ ఇప్పుడు స్టార్ అట్రాక్షన్‌గా మారాడు. మొహాలీలో చెన్నై సూపర్ కింగ్స్‌తో జరిగిన మ్యాచులో 63 బంతుల్లో 120 పరుగులు చేసి అందరి దృష్టినీ ఆకట్టుకోవడమే కాకుండా భారత క్రికెట్ జట్టు కెప్టెన్ మహేంద్ర సింగ్ ధోనీ ప్రశంసలు కూడా అందుకున్నాడు. అనిల్ కుంబ్లే వంటి సీనియర్ క్రికెటర్ల నోట కూడా వాల్తాటీ మాటనే వినిపిస్తోంది. ఆ సెంచరీతో ఓ అద్భుతం చేసి తర్వాత చల్లబడకుండా అతను ప్రతి ఆటలోనూ తన ప్రదర్శనను, నిలకడైన ఆటను చూపిస్తున్నాడు.

ఐపియల్‌లో అందరి కన్నా ఎక్కువ ఆకట్టుకుంటున్న ఆటగాడు పాల్ వాల్తాటీ అని, అతని ఆటెలా ఉంటుందో తమకు కూడా చూపించాడని హైదరాబాద్ డెక్కన్ చార్జర్స్ కెప్టెన్ కుమార్ సంగక్కర అన్నారు. ఒక మ్యాచ్ అద్భుతంలా కాకుండా నిలకడగా రాణిస్తున్నాడని, ఐపియల్ వర్ధమాన ఆటగాళ్లలో అందరి కన్నా అతనే ముందున్నాడని సంగక్కర మెచ్చుకున్నాడు. వాల్తాటీ ఐపియల్ 4లో అంతగా సీనియర్ ఆటగాళ్లను ఆకట్టుకన్నాడు. పాల్ వాల్తాటీ స్టయిలిష్‌గా, బుక్ షాట్స్‌తో క్రికెట్ అభిమానులను అలరిస్తున్నాడు.

ఐపియల్‌ మ్యాచుల ద్వారా అంతర్జాతీయ దృష్టిని ఆకర్షించిన ఆ కుర్రాడు తెలుగువాడే. అతని తల్లిదండ్రులు పద్మావతి, చంద్రశేఖర్‌లది కర్నూలు జిల్లా నంద్యాల. పాల్ వాల్తాటీ అసలు పేరు పాల్ చంద్రశేఖర్. వాల్తాటి ఇంటిపేరు. చంద్రశేఖర్‌కు బదిలీ కావడంతో ముంబై వెళ్లాడు. అక్కడే పాల్ వాల్తాటీ జన్మించాడు. నంద్యాలలో పాల్ వాల్తాటీ బంధువులు ఉన్నారు. ప్రతి యేటా క్రిస్ట్మస్ పర్వదినానికి పాల్ వాల్తాటీ కుటుంబ సభ్యులు నంద్యాలకు వస్తారు. వాల్తాటీ ముగ్గురు అక్కలు కూడా విదేశాల్లో ఉన్నారు.

English summary

Paul Valthaty may not inspire much confidence when he trudges in to bat -- no funky haircut and no flashy bling on show at the glitzy, celebrity-centered Indian Premier League. Paul Valthaty belongs to Nandyala of Kurnool district.