మరో వందకోట్లకు 'సూరి' టెండర్!

అవినీతి నిరోధక శాఖకు చిక్కిన మత్స్యశాఖ ఎగ్జిక్యూటివ్ ఇంజినీర్ వెలుగుబంటి సూర్యనారాయణ ఉదంతం రాష్ట్రాన్ని ఇంకా ఊగిస్తోంది. దినసరి వేతనంపై మత్స్యశాఖలో చేరిన అతను మాయా మశ్చీంధ్రగా ఎలా మారాడన్నది అందరినీ విస్మయ పరుస్తోంది. అతని ఆస్ధులు 100 కోట్లు అనే సరికి ముఖ్యమంత్రే ముక్కున వేలేసుకోవలసి వచ్చింది. 30 వేల జీతగాడు (గతంలో రోజుకు వందరూపాయల వేతనమే) ఇంత సంపదను ఎలా పెంచుకున్నాడని సీనియర్ ఐఎఎస్ అధికారులు ఆశ్చర్యపోతున్నారు.

కానీ ఒక ఆంగ్లపత్రిక కథనం ప్రకారం సూర్యనారాయణ ఆస్తులు దాదాపు 250 కోట్లు. ఆయనకు విద్యాశాఖ సివిల్ కాంట్రాక్టు ఒక్క రోజు వ్యవధిలో మిస్ అయింది. ఆ కాంట్రాక్టు విలువ అక్షరాలా వందకోట్లు. ఫిషరీస్ డిపార్ట్ మెంట్ పేరుతో బినామీ ఖాతాలు తెరవడంలో ఆయనకు బ్యాంకు అధికారులు బాగా సహకరించారు. డిసెంబర్ 12 న ఎసిబి అధికారులు ఆయనను అరెస్టు చేయకుండా ఉంటే ఆ వంద కోట్ల కాంట్రాక్టు ఈ "ఎలుగుబంటి"కి దక్కేది.

ఫిషరీస్ శాఖలో సివిల్ ఇంజినీరింగ్ విభాగం ఇంచార్జి అయిన సూర్యనారాయణ ఇతర ప్రభుత్వ శాఖల్లోని సివిల్ ఇంజినీరింగ్ పనులను తన విభాగం ద్వారా జరిపించేవాడు. పనులన్నీ నాసిరకమే. కాంట్రాక్టర్లకు తానే పెట్టుబడి పెట్టి వడ్డీతో పాటు కమిషన్లు తీసుకునేవాడు. ఇటువంటి వ్యక్తి మీద నాలుగున్నరేళ్ళుగా చర్యలు తీసుకోకుండా ఇప్పుడు కళ్ళు తెరచిన ప్రభుత్వం ప్రజల దృష్టిలో తీవ్రంగా అప్రదిష్టపాలైంది.