నారా లోకేష్ ఎంట్రీకి బాబు ప్లాన్

తన కుమారుడు నారా లోకేష్ రాజకీయ ఎంట్రీకి తెలుగుదేశం పార్టీ అధ్యక్షుడు నారా చంద్రబాబు నాయుడు ఎప్పుడో ప్లాన్ సిద్ధం చేశారనే మాట వినిపిస్తోంది. రైతు సమస్యలపై అప్పట్లో చంద్రబాబు నిరవధిక నిరాహార దీక్షను చేపట్టారు. ఆ సమయంలో లోకేష్‌ను రాజకీయాల్లోకి తేవాలని ప్రణాళిక సిద్ధం చేసినట్లు చెబుతున్నారు. తన వారసుడిగా లోకేష్‌ను ముందుకు తెచ్చేందుకు ఆయన చాలా కాలంగా ప్రయత్నిస్తున్నట్లు సమాచారం. ఇందులో భాగంగానే, రైతు సమస్యలపై చంద్రబాబు చేపట్టిన దీక్షను ప్రభుత్వం భగ్నం చేస్తే వెంటనే ఆయన స్థానంలో నారా లోకేష్ దీక్షకు దిగాలనేది చంద్రబాబు అసలు వ్యూహమట.

లోకేష్ దీక్ష ప్రారంభించే విషయంలో ఆ తర్వాత చంద్రబాబు వెనక్కి తగ్గారని అంటున్నారు. రైతు సమస్యలపై తనకు చిత్తశుద్ధి లేదని, తనయుడి రాజకీయాల్లోకి తెచ్చి పార్టీ పగ్గాలు అప్పగించడానికే దీక్ష పేర నాటకం ఆడుతున్నారని విమర్శలు వస్తాయని సందేహించి చంద్రబాబు వెనక్కి తగ్గినట్లు వినికిడి. రైతుల సమస్యలపై తాను చేపట్టిన దీక్షలో నిజాయితీ లేదనే విమర్శలు రాకూడదనే అప్పటికప్పుడు లోకేష్ దీక్ష చేపట్టాలనే తొలి వ్యూహాన్ని మార్చేసుకున్నట్లు చెబుతారు. చంద్రబాబు దీక్ష సందర్భంగా నారా లోకేష్ చురుగ్గా వ్యవహరించిన విషయం అందరూ గమనించే ఉంటారు.

English summary

It is said that TDP president N Chandrababu naidu has planned his son Nara Lokesh's political entry long back. But later he changed his plan suspecting criticism from opponents.