కొంపముంచుతున్న కొత్త వేరియంట్: ఈ 5 లక్షణాలు ఉంటే అస్సలు నిర్లక్ష్యం చేయకండి!

Cicada COVID Variant BA. 3.2: కరోనా మహమ్మారి కొత్త వేరియంట్లు ప్రపంచాన్ని మళ్లీ ఆందోళనకు గురిచేస్తున్నాయి. 'సికాడా(Cicada)' అని పిలవబడే కొత్త కొవిడ్ వేరియంట్ BA. 3.2 ప్రస్తుతం పిల్లలపై తీవ్ర ప్రభావం చూపుతోంది. ఈ వేరియంట్ పెద్దల కంటే పిల్లలకు 5 రెట్లు వేగంగా సోకే ప్రమాదం ఉందని తాజా రిపోర్టులు హెచ్చరిస్తున్నాయి. 2024 నవంబర్‌లో దక్షిణాఫ్రికాలో మొదటిసారిగా వెలుగుచూసిన ఈ వేరియంట్ ఇప్పుడు 23 దేశాలకు పైగా వ్యాపించింది. అమెరికాలోని దాదాపు 25 రాష్ట్రాల మురుగునీటి నమూనాల్లో దీని ఆనవాళ్లు కనిపించడం పరిస్థితి తీవ్రతను తెలియజేస్తోంది.

పిల్లలకే ఎందుకు ఎక్కువ ముప్పు?

సికాడా వేరియంట్‌లో 70కి పైగా స్పైక్ ప్రోటీన్ మ్యుటేషన్లు ఉన్నాయి. ఇవి గతంలో తీసుకున్న వ్యాక్సిన్ల ద్వారా శరీరంలో తయారైన యాంటీబాడీల నుంచి సులభంగా తప్పించుకోగలవు. పిల్లల రోగనిరోధక వ్యవస్థ ఇంకా పూర్తిస్థాయిలో అభివృద్ధి చెందకపోవడం వల్ల వారు ఈ వైరస్ బారిన త్వరగా పడుతున్నారు. అంతేకాకుండా పిల్లలు స్కూలుకు వెళ్లడం, బయట ఆడుకోవడం, పరిశుభ్రత పట్ల తక్కువ అవగాహన కలిగి ఉండటం వల్ల వైరస్ వ్యాప్తి చెందే అవకాశం ఎక్కువగా ఉంది. ఇండియాలో 12-14 ఏళ్ల వయస్సు గల పిల్లల్లో మొదటి రెండు డోసు కవరేజీ బాగున్నప్పటికీ బూస్టర్ డోస్ విషయంలో ఇంకా వెనుకబడే ఉన్నారని గణాంకాలు చెబుతున్నాయి.

గుర్తించాల్సిన లక్షణాలు

సికాడా వేరియంట్ సోకిన పిల్లల్లో సాధారణ కొవిడ్ లక్షణాలే కనిపిస్తాయి. అయితే వీటిని నిర్లక్ష్యం చేయకూడదు.

*తీవ్రమైన దగ్గు, గొంతు నొప్పి.

*శ్వాస తీసుకోవడంలో ఇబ్బంది.

*ముక్కు దిబ్బడ లేదా జలుబు.

*వాంతులు, వికారం, రుచి, వాసన కోల్పోవడం.

*ప్రస్తుతానికి ఈ వేరియంట్ వల్ల ఆస్పత్రిలో చేరాల్సినంత తీవ్రమైన అనారోగ్యం కలగడం లేదని నిపుణులు చెబుతున్నప్పటికీ, లక్షణాలు తగ్గకుండా పదేపదే ఇబ్బంది పెడుతుంటే తక్షణమే వైద్యులను సంప్రదించాలి.

పిల్లల రక్షణ కోసం తీసుకోవాల్సిన జాగ్రత్తలు

తల్లిదండ్రులు, సంరక్షకులు ఈ క్రింది సూచనలను పాటించడం ద్వారా పిల్లలను సురక్షితంగా కాపాడుకోవచ్చు.
*బూస్టర్ డోస్: మీ పిల్లలు బూస్టర్ డోస్‌కు అర్హులైతే, వెంటనే వ్యాక్సినేషన్ ఇప్పించండి. ఇది వారి రోగనిరోధక శక్తిని పెంచుతుంది.

*మాస్క్ ధరించడం: స్కూల్స్ లేదా రద్దీగా ఉండే ఇండోర్ ప్రదేశాల్లో పిల్లలు మాస్క్ ధరించేలా చూడండి. దీనివల్ల కొవిడ్ మాత్రమే కాకుండా సాధారణ జలుబు, దగ్గు నుంచి కూడా రక్షణ లభిస్తుంది.

*పరిశుభ్రత: చేతులను తరచుగా సబ్బుతో కడుక్కోవడం, పరిసరాలను శుభ్రంగా ఉంచుకోవడం అలవాటు చేయాలి.

*వెంటిలేషన్: గాలి వెలుతురు సరిగ్గా ఆడని గదుల్లో వైరస్ వేగంగా వ్యాపిస్తుంది. కాబట్టి గదుల్లో సరైన గాలి ఆడేలా చూడాలి.

ఆందోళన వద్దు.. అప్రమత్తతే ముద్దు

ప్రపంచ ఆరోగ్య సంస్థ(WHO), భారత ఆరోగ్య మంత్రిత్వ శాఖ ప్రస్తుతం ప్రజారోగ్యానికి తక్షణ ముప్పు ఏమీ లేదని స్పష్టం చేశాయి. అయితే వైరస్ మ్యుటేషన్ల దృష్ట్యా అప్రమత్తంగా ఉండటం అవసరమని సూచించాయి. తల్లిదండ్రులు అనవసరమైన ఆందోళన చెందకుండా, కొవిడ్ ప్రోటోకాల్స్‌ను పాటిస్తూ పిల్లలకు ధైర్యం చెప్పాలి. వైరస్ గురించి పాఠశాల స్థాయిలోనే అవగాహన కల్పించడం, నిరంతరం వైద్యుల సలహాలు తీసుకోవడం ద్వారా ఈ కొత్త వేరియంట్ నుంచి పిల్లలను కాపాడుకోవచ్చు.

English summary

New COVID variant BA.3.2 'Cicada' is spreading rapidly. Learn why children are 5 times more at risk, key symptoms, and essential safeguard tips for parents.