టేస్టీ టేస్టీ "బెండకాయ మటన్ కర్రీ" ఎలా చేయాలంటే..?

తెలుగు ఇంటి వంటల్లో ప్రత్యేక స్థానం ఉన్న నాన్‌వెజ్ కర్రీల్లో బెండకాయ మటన్ కర్రీ ఒక ప్రత్యేకమైన రుచిని అందిస్తుంది. మటన్ మసాలా రుచికి బెండకాయ యొక్క సాఫ్ట్ టెక్స్చర్ కలిసిపోతే వచ్చే ఫ్లేవర్ మరింత రుచికరంగా ఉంటుంది. సాధారణ మటన్ కర్రీకి భిన్నంగా, ఇది కొంచెం మసాలా టచ్‌తో పాటు ప్రత్యేకమైన టేస్ట్‌ను ఇస్తుంది. అన్నం, రోటీ, చపాతీ ఏదితో అయినా ఈ కర్రీ అద్భుతంగా సరిపోతుంది. అంతే కాకుండా అయితే బెండకాయ అంటే చాలామందికి ఇష్టముండదు.

బెండకాయ బంకగా ఉంటుందని.. రుచి ఉండదని ఎక్కువ మంది తినడానికి ఆసక్తి చూపరు. కానీ కొందరు మాత్రం బెండకాయ వేపుడు మాత్రమే తింటుంటారు. ఈ తరహా విషయాలు అన్నింటికీ చెక్ పెడుతూ పిల్లలకి అయిన పెద్దలకు అయినా కానీ ఇష్టంగా బెండకాయ తినిపించేందుకు బెస్ట్ ప్లాన్ ఇదే. ఈ స్పెషల్ కర్రీ రుచికరంగానే కాకుండా పోషక విలువల పరంగానూ మేలు చేస్తుంది. మటన్ ప్రోటీన్ పుష్కలంగా ఉండగా, బెండకాయలో ఫైబర్ ఎక్కువగా ఉంటుంది. జీర్ణక్రియకు మంచిది, తక్కువ సమయంలో సులభంగా తయారయ్యే ఈ వంటకం రోజువారీ భోజనానికి కూడా చక్కగా సరిపోతుంది. ఈ వంటకం ఎలా చేయాలో మీకోసం ప్రత్యేకంగా..

కావలసిన పదార్థాలు..

మటన్ - 500 గ్రాములు (శుభ్రం చేసినవి)

బెండకాయలు - 250 గ్రాములు (ముక్కలుగా కోసినవి)

ఉల్లిపాయలు - 2 (సన్నగా తరిగినవి)

టొమాటోలు - 2 (తరిగినవి)

అల్లం-వెల్లుల్లి పేస్ట్ - 2 టేబుల్ స్పూన్లు

కారం - 1-2 టీస్పూన్లు

పసుపు - ½ టీస్పూన్

ధనియాల పొడి - 1 టేబుల్ స్పూన్

గరం మసాలా - 1 టీస్పూన్

నూనె/నెయ్యి - 3-4 టేబుల్ స్పూన్లు

కొత్తిమీర - కొద్దిగా

ఉప్పు - తగినంత

జీలకర్ర - ½ టీస్పూన్

బిర్యానీ ఆకు (Bay leaf) - 1

దాల్చిన చెక్క, లవంగాలు - 2-3

మిరియాల పొడి - కొద్దిగా

ముందస్తు తయారీ..

మటన్‌ను ముందుగా అల్లం-వెల్లుల్లి పేస్ట్, ఉప్పు, పసుపు, కారం వేసి కనీసం 20-30 నిమిషాలు మ్యారినేట్ చేస్తే కర్రీకి మంచి రుచి వస్తుంది. బెండకాయలను కడిగిన తర్వాత పూర్తిగా తుడిచేసి కోయాలి. లేకపోతే జిగురు ఎక్కువ అవుతుంది.

తయారీ విధానం..

మటన్ ఉడికించడం :

ప్రెషర్ కుక్కర్‌లో నూనె వేడి చేసి జీలకర్ర, బిర్యానీ ఆకు, లవంగాలు వేసి వేయించాలి. తరువాత ఉల్లిపాయలను గోల్డెన్ బ్రౌన్ అయ్యే వరకు వేయించాలి.

అల్లం-వెల్లుల్లి పేస్ట్ వేసి పచ్చివాసన పోయే వరకు వేయించి, మ్యారినేట్ చేసిన మటన్‌ను జోడించాలి.

మటన్ రంగు మారే వరకు బాగా వేయించి, కొద్దిగా నీరు పోసి 3-4 విజిల్స్ వచ్చే వరకు ఉడికించాలి.

బెండకాయలను వేయించడం :

మరో పాన్‌లో కొద్దిగా నూనె వేసి బెండకాయ ముక్కలను జిగురు పోయే వరకు వేయించాలి. ఎక్కువగా కలపకుండా మిడిల్ ఫ్లేమ్‌లో వేయిస్తే బెండకాయలు సరిగ్గా కుక్ అవుతాయి.

మసాలా కలపడం :

కుక్కర్ మూత తీసి, టొమాటో ముక్కలు, కారం, ధనియాల పొడి వేసి కలపాలి.

టొమాటోలు మెత్తబడిన తర్వాత వేయించిన బెండకాయలను జోడించాలి.

మంట తక్కువగా పెట్టి 5-7 నిమిషాలు ఉడికించాలి. ఈ సమయంలో కర్రీలో నూనె పైకి తేలడం మొదలవుతుంది.

చివరి టచ్ :

చివరగా గరం మసాలా, మిరియాల పొడి చల్లి, కొత్తిమీరతో గార్నిష్ చేయాలి.

అల్ప మంటపై 2 నిమిషాలు ఉంచి స్టవ్ ఆఫ్ చేయాలి.

రుచిని పెంచే చిట్కాలు..

బెండకాయలను ముందుగా వేయించడం వల్ల జిగురు తగ్గి కర్రీ టెక్స్చర్ బాగుంటుంది.

మటన్‌ను ఎక్కువగా ఉడికిస్తే మరింత మెత్తగా, రుచిగా ఉంటుంది.

కొద్దిగా నెయ్యి చివర్లో వేసితే కర్రీకి అదనపు సువాసన వస్తుంది.

స్పైసీగా కావాలంటే గ్రీన్ చిల్లీస్ కూడా జోడించవచ్చు.

ఎలా సర్వ్ చేయాలి?

వేడివేడిగా ఉన్న బెండకాయ మటన్ కర్రీని తెల్లన్నం, జీరా రైస్, రోటీ లేదా చపాతీతో సర్వ్ చేస్తే అద్భుతమైన రుచి వస్తుంది. ప్రత్యేక సందర్భాల్లో లేదా వీకెండ్ స్పెషల్‌గా ఈ కర్రీ మీ ఇంట్లో అందరినీ ఆకట్టుకుంటుంది.

English summary

Among the non-veg curries that have a special place in Telugu home cooking, the bendakaya mutton curry offers a unique taste. The soft texture of the bentakaya combined with the spicy taste of the mutton makes the resulting flavor even more delicious.