జన్మ నక్షత్రం ఉత్తరాషాఢ, శ్రవణం ఉన్నవారి మే నెల జాతక ఫలం

తెలుగు సంప్రదాయం, వేద జ్యోతిష్య శాస్త్రం ప్రకారం జన్మ నక్షత్రానికి అత్యంత ప్రాధాన్యత ఉంది. ఒక వ్యక్తి పుట్టినప్పుడు చంద్రుడు ఏ నక్షత్రంలో ఉంటే, దాన్నే ఆ వ్యక్తి 'జన్మ నక్షత్రం' అని పిలుస్తారు. జాతక చక్రం మొత్తం ఈ జన్మ నక్షత్రం ఆధారంగానే నిర్మించబడుతుంది. జ్యోతిష్య శాస్త్రం ప్రకారం చంద్రుడు మనస్సుకు అధిపతి. కాబట్టి, పుట్టినప్పుడు చంద్రుడు ఉన్న నక్షత్రం ఆ వ్యక్తి ఆలోచనా తీరును, ప్రవర్తనను, స్వభావాన్ని నిర్ణయిస్తుంది.

మనకు తెలుగులో 27 నక్షత్రాలున్నాయి. ఇవి కాకుండా ఉత్తరాషాఢ, శ్రవణా నక్షత్రాల మధ్య సూక్ష్మమైన అభిజిత్ నక్షత్రం ఉంటుంది. శుభ ముహూర్తాల కోసం దీన్ని పరిగణనలోకి తీసుకుంటారు. నక్షత్రం మాత్రమే మొత్తం జాతకాన్ని నిర్ణయించదు. జాతక చక్రంలో ఉండే లగ్నం, ఇతర గ్రహాల స్థితి , అవి ఇచ్చే దృష్టి కూడా ఫలితాలను మారుస్తాయి. అందుకే నక్షత్రాన్ని జాతకానికి పునాదిగా తీసుకుంటారు. వ్యక్తిగత జాతకంలోని గ్రహ స్థితులు, దశలను బట్టి ఫలితాల్లో అప్పుడప్పుడు స్వల్ప మార్పులు చోటుచేసుకునే అవకాశం ఉంటుంది.

2026లో శని గ్రహం మీన రాశిలోకి ప్రవేశించడం వల్ల మకర రాశి వారికి ఏలినాటి శని ముగిసి, రాజయోగం వంటి ఫలితాలు ప్రారంభమవుతాయి. ముఖ్యంగా మే నెలలో గ్రహాల అనుకూలత వల్ల ఆశించిన పురోగతి కనిపిస్తుంది. ఏలినాటి శని ప్రభావం నుండి విముక్తి లభిస్తుండటంతో, గతంలో ఎదుర్కొన్న అడ్డంకులు ఒక్కొక్కటిగా తొలగిపోతాయి.

ఉత్తరాషాఢ నక్షత్రం

సూర్యుడు అధిపతిగా ఉండే ఈ నక్షత్రం వారికి మే నెల 'అధికారం, ఆస్తి లాభాలను' తెస్తోంది. కార్యాలయంలో మాటకు విలువ పెరుగుతుంది. పై అధికారుల నుండి ప్రశంసలు లభిస్తాయి. తలపెట్టిన ప్రాజెక్టులు విజయవంతంగా పూర్తి చేస్తారు. రాజకీయ లేదా ప్రభుత్వ రంగాల్లో ఉన్నవారికి కొత్త పదవులు లేదా బాధ్యతలు దక్కే అవకాశం ఉంది. మే నెలలో ఆర్థిక పరిస్థితి మెరుగుపడుతుంది. ముఖ్యంగా మే 15 నుండి జూన్ మధ్య ఆస్తి లేదా భూమికి సంబంధించిన క్రయ విక్రయాల్లో భారీ ధనలాభం కలిగే సూచనలున్నాయి. గతంలో పెట్టిన పెట్టుబడుల నుండి లాభాలు వస్తాయి. కుటుంబంలో శుభకార్యాలకు సంబంధించిన చర్చలు జరుగుతాయి. పని ఒత్తిడి వల్ల మే ద్వితీయార్థంలో వెన్నునొప్పి లేదా కీళ్ల నొప్పులు ఇబ్బంది పెట్టవచ్చు. తగినంత విశ్రాంతి అవసరం. ఆదివారం రోజు ఆదిత్య హృదయం పఠించడం, సూర్య నమస్కారాలు చేయడం వల్ల ఆత్మవిశ్వాసం పెరుగుతుంది.

శ్రవణా నక్షత్రం

చంద్రుడు అధిపతిగా ఉండే ఈ నక్షత్రం వారికి మే నెల 'కీలక మార్పులు, అదృష్ట యోగాలను' ఇస్తుంది. నిరుద్యోగులకు మంచి ఉద్యోగ అవకాశాలు లభిస్తాయి. మీరు ఎప్పటి నుంచో ఎదురుచూస్తున్న ప్రమోషన్ లేదా బదిలీ ఈ నెలలో సంభవించవచ్చు. వ్యాపారస్తులకు నూతన భాగస్వామ్య ఒప్పందాలు కలిసివస్తాయి. సొంత ప్రయత్నాలకు తగిన గుర్తింపు లభిస్తుంది. ఆదాయం స్థిరంగా ఉంటుంది. పెండింగ్‌లో ఉన్న బకాయిలు వసూలవుతాయి. విదేశీ ప్రయాణాల కోసం లేదా విలాస వస్తువుల కోసం డబ్బు ఖర్చు చేస్తారు. షేర్ మార్కెట్ లేదా స్పెక్యులేషన్లలో జాగ్రత్తగా వ్యవహరించడం మంచిది. భార్యాభర్తల మధ్య సఖ్యత పెరుగుతుంది. సంతానానికి సంబంధించి ఒక శుభవార్త వింటారు. ఆరోగ్యం సాధారణంగా ఉన్నప్పటికీ, మానసిక ప్రశాంతత కోసం యోగా లేదా ధ్యానం చేయడం ఉత్తమం. ఈ నెలలో ఒక విజ్ఞానదాయకమైన పర్యటన చేసే అవకాశం ఉంది. ఇది కెరీర్‌కు కొత్త దిశను ఇస్తుంది. సోమవారం రోజు శివునికి అభిషేకం చేయడం, పేదలకు పాలు లేదా తెల్లని వస్తువులు దానం చేయడం వల్ల దోష నివారణ కలుగుతుంది.