హీరోయిన్ మాధవి ప్రజారాజ్యంలోకి?

హైదరాబాద్: ఒకనాటి మేటి హీరోయిన్ మాధవి ప్రజారాజ్యం పార్టీలో చేరనున్నట్టు తెలుస్తోంది. మెగాస్టార్‌ చిరంజీవితో హిట్‌ ఫెయిర్‌గా పేరుగాంచిన మాధవిని పెద్దపల్లి పార్లమెంటు నియోజక వర్గం నుంచి పీఆర్‌పీ అభ్యర్థిగా దింపడానికి ఆ పార్టీ యోచిస్తున్నట్లు సమాచారం. ఇప్పటికే మాధవి రెండు సార్లు చిరంజీవిని కలిసినట్లు తెలిసింది. మాధవి చిరంజీవి కలిసి నటించిన ఖైదీ, ఇంట్లో రామయ్య-వీధిలో క్రిష్ణయ్య లాంటి చిత్రాలు సూపర్‌హిట్‌ అయిన విషయం విదితమే.

మాధవి 2004 ఎన్నికలలో పెద్దపల్లి పార్లమెంటుకు పోటీ చేస్తారని, టీడీపీ అభ్యర్థిగా రంగంలో ఉంటారని ఊహాగానాలు వెలువడ్డాయి. ఇప్పుడు మరోసారి మాధవి పేరు తెరపైకి వచ్చింది. ఈ విషయంపై పీఆర్‌పీ నాయకులు ఇక్కడ చర్చిస్తున్నారు. మాధవి చేరితే ఆమె పీఆర్‌పీలో చేరే ప్రథమ హీరోయిన్‌ అవుతారు.