కాంగ్రెస్సే నన్ను అడ్డుకుంది: సంజయ్

లక్నో: ఎన్నికల్లో తాను పోటీ చేయటాన్ని ఎవరైనా అడ్డుకున్నారంటే అది కేంద్రమేనని బాలీవుడ్‌ హీరో సంజయ్‌ దత్‌ అన్నారు. దానికి మీరు ఎలాంటి వ్యాఖ్యానాలు చేసినా అది మీ ఇష్టమని మీడియాను ఉద్దేశించి అన్నారు. సంజయ్‌ను అడ్డుకునేందుకు సీబీఐని పావులా కేంద్రం ఉపయోగించిందని ఆరోపిస్తూ సమాజ్‌వాదీ నేత అమర్‌ సింగ్‌ అందుకు సంబంధించిన సీడీలను సాక్ష్యంగా ప్రవేశపెట్టారు. ఈ సందర్భంగా సంజయ్‌ ఆ విధంగా వ్యాఖ్యలు చేశారు.

పోటీ చేయడానికి సుప్రీంకోర్టు సంజయ్ ను అనర్హుడిగా ప్రకటిస్తూ మంగళవారం ఆదేశాలు జారీ చేసింది. తాను లక్నోలోనే ఉంటానని, లక్నో నుంచి తాను వెళ్లేది లేదని ఆయన అందుకు ప్రతిస్పందనగా అన్నారు. లక్నోలో తనకు ఇల్లు ఉందని ఆయన చెప్పారు. లక్నో నుంచి సంజయ్ దత్ ను పోటీ దింపడానికి సమాజ్ వాదీ పార్టీ నిర్ణయించుకున్న సంగతి తెలిసిందే. సంజయ్ ను సుప్రీంకోర్టు పోటీకి అనర్హుడిగా ప్రకటించడంతో ఇప్పుడు సంజయ్ భార్య మాన్యతను పోటీకి దించేందుకు సమాజ్ వాదీ పార్టీ సిద్ధపడుతోంది.