కాంగ్రెస్ కు చిరు వ్యతిరేకమే: రాఘవులు

హైదరాబాద్‌: మహాకూటమికి మెజారిటీ రాకుంటే, పీఆర్పీ మద్దతు పొందడం కోసం ఇప్పుడే మధ్యవర్తిత్వం చేయాల్సిన పనిలేదని సీపీఎం రాష్ట్ర కార్యదర్శి రాఘవులు అన్నారు. "అటువంటి పరిస్థితి వస్తే చిరంజీవే ఆలోచించుకోవాలి. కాంగ్రెస్‌కు వ్యతిరేకంగా ఆ పార్టీ పని చేసింది. దీనిపైఆ పార్టీయే రాజకీయ నిర్ణయం తీసుకోవాలి'' అని రాఘవులు మంగళవారం విలేఖరులతో అన్నారు.

రాష్ట్రంలో సొంతంగా ప్రభుత్వం ఏర్పాటు చేయడానికి అవసరమైనంత బలం టీడీపీకి ఒంటరిగా రాకపోవచ్చునని, మహాకూటమికి మాత్రం మెజారిటీ వస్తుందని అన్నారు. పీఆర్పీకి తగినన్ని సీట్లు వస్తే రొటేషన్‌ పద్ధతిలో చిరుకు సీఎం పదవి ఇవ్వాలన్నది నారాయణ వ్యక్తిగత అభిప్రాయమని టీడీపీ నేత కంభంపాటి రామ్మోహన్‌రావు వ్యాఖ్యానించారు. "మహాకూటమికి పూర్తి మెజారిటీ వస్తుందని, మరొకరి అవసరం ఉండకపోవచ్చునని మేం భావిస్తున్నాం. అదే సమయంలో పీఆర్పీ సహా ఏ పార్టీని దూరం చేసుకోవాలని మేం భావించడం లేదు'' అని స్పష్టంచేశారు.