అసెంబ్లీలో సంస్కారమేది: జెపి

హైదరాబాద్: శాసనసభలో మర్యాద, సంస్కారం, సభ్యత కనిపించడం లేదని లోకసత్తా శాసనసభ్యుడు జయప్రకాష్ నారాయణ్ అన్నారు. శాసనసభా సమావేశాలు హైదరాబాదు నగరపాలక సంస్థ సమావేశాల్లా జరుగుతున్నాయని ఆయన అన్నారు. మెట్రో రైలు ప్రాజెక్టుపై చర్చ సందర్భంగా ముఖ్యమంత్రి డాక్టర్ వైయస్ రాజశేఖర రెడ్డి, ప్రతిపక్ష నాయకుడు నారా చంద్రబాబు నాయుడు మధ్య చెలరేగిన వివాదంపై ఆయన సోమవారం శాసనసభలో తీవ్రంగా ప్రతిస్పందించారు. ఆ ఇద్దరు నాయకులను కూడా ఆయన తప్పు పట్టారు. ఇది శాసనసభలా లేదని ఆయన అన్నారు. సభా నియమాలు పాటించి ఇవ్పటికైనా శాసనసభను అర్థవంతంగా నడిపించాలని ఆయన కోరారు.

శాసనసభలో వార్షిక బడ్డెట్ పై హేతుబద్దమైన చర్చ జరగడం లేదని ఆయన ఆవేదన వ్యక్తం చేశారు. శాసనసభా సమావేశాలు ప్రారంభమై ఆరు రోజులు గడుస్తోందని, ఇప్పటి వరకు అర్థవంతమైన చర్చ జరగలేదని ఆయన అన్నారు. సభలోని సభ్యులు ప్రజలను తప్పు దోవ పట్టిస్తున్నారని ఆయన విమర్శించారు.