భారత విద్యార్థుల భద్రతకు రుడ్ హామీ

చాకు కైర్న్స్: భారత విద్యార్థుల రక్షణకు, భద్రతకు తగిన చర్యలు తీసుకుంటామని ఆస్ట్రేలియా ప్రధాని కెవిన్ రుడ్ భారత విదేశాంగ మంత్రి ఎస్ ఎం కృష్ణకు హామీ ఇచ్చారు. రుడ్ తో కృష్ణ శుక్రవారం దాదాపు 20 నిమిషాల పాటు రహస్యంగా చర్చలు జరిపారు. భారత విద్యార్థులపై దాడులను నిరోధించేందుకు ఆస్ట్రేలియా తీసుకున్న చర్యల పట్ల కృష్ణ సంతృప్తి వ్యక్తం చేశారు. ఆస్ట్రేలియా ప్రధాని రుడ్ ఇచ్చిన హామీతో తాను సంతృప్తి చెందినట్లు ఆయన సమావేశానంతరం మీడియా ప్రతినిధులతో అన్నారు.

విద్యార్థులకు సంబంధించిన విషయాల సున్నితత్వం రుడ్ కు తెలుసునని, ప్రభుత్వం తీసుకున్న చర్యలను రుడ్ తనకు వివరించారని ఆయన చెప్పారు. భవిష్యత్తు శక్తిగా భారత్ ను రుడ్ అభివర్ణించారని, ఇక్కడికి వచ్చే భారత విద్యార్థులకు తగిన భద్రత ఉంటుందని తాను నమ్ముతున్నానని ఆయన అన్నారు. భారత విద్యార్థులను తమ దేశానికి ఆహ్వానిస్తున్నామని రుడ్ కృష్ణతో చెప్పారు. భారత విద్యార్థుల సమస్యలతో పాటు వాణిజ్యం వంటి ద్వైపాక్షిక అంశాలపై కూడా ఇరువురు నేతల మధ్య చర్చలు జరిగాయి.