ప్రేమ: హోంగార్డు ఆత్మహత్యా యత్నం

మచిలీపట్నం: పెళ్లికి పెద్దలు అంగీకరించకపోవటంతో ఇద్దరు ప్రేమికులు ఆత్మహత్యకు యత్నించారు. బుధవారం రాత్రి చోటుచేసుకున్న ఈ సంఘటన వివరాలు ఇలా ఉన్నాయి. మండల పరిధిలోని కూడూరుకు చెందిన పామర్తి శ్రీనివాసరావు అదే గ్రామానికి చెందిన అనురాధ నాలుగేళ్లుగా ప్రేమించుకుంటున్నారు. శ్రీనివాసరావు నాలుగు నెలలుగా హోంగార్డుగా పనిచేస్తున్నాడు. ప్రస్తుతం పెడన పోలీస్‌స్టేషన్‌లో విధులు నిర్వహిస్తున్నాడు.

ఈ నేపథ్యంలో బుధవారం శ్రీను తన కుటుంబసభ్యులతో ప్రేమ విషయం చెప్పాడు. అనూరాధను వివాహమాడేందుకు అతని తల్లిదండ్రులు అంగీకరించలేదని తెలుస్తోంది. శ్రీను ఈ విషయం అనురాధకు వివరించాడు. దీంతో బుధవారం రాత్రి అనురాధ ఇంటిపక్కనే ఇద్దరు నిద్రమాత్రలు మింగారు. దీన్ని గమనించిన స్థానికులు వీరి తల్లిదండ్రులకు, 108కు సమాచారం అందించారు. అంబులెన్స్‌ సిబ్బంది వీరిని బందరు ప్రభుత్వాస్పత్రికి తరలించారు. గురువారం రాత్రి వీరిద్దరి పరిస్థితి మెరుగుపడింది.