బొత్సా దారిలో మరో మంత్రి మోపిదేవి

హైదరాబాద్: రాష్ట్ర విభజన మంచిదేనన్న రాష్ట్ర పంచాయతీరాజ్ శాఖ మంత్రి బొత్స సత్యనారాయణకు మద్దతు పెరుగుతోంది. బొత్సా సత్యనారాయణకు మరో మంత్రి మోపిదేవి వెంకటరమణ మద్దతు పలికారు. బొత్స సత్యనారాయణ వ్యాఖ్యల్లో తప్పు లేదని ఆయన మంగళవారం మీడియా ప్రతినిధులతో అన్నారు. మరింత మంది శాసనసభ్యులు, మంత్రులు బొత్స బాట పట్టే అవకాశం ఉందనే సూచన కూడా ఆయన చేశారు. తామంతా సమావేశమై ఈ విషయంపై మాట్లాడుకుంటామని ఆయన అన్నారు.

మరో మంత్రి విశ్వరూప్ పూర్తిగా బొత్స సత్యనారాయణకు మద్దతు ప్రకటించకపోయినప్పటికీ ఖండించలేదు. బొత్స సత్యనారాయణ వ్యాఖ్యలను ఖండించాల్సిన అవసరం లేదని ఆయన అన్నారు. అది బొత్స సత్యనారాయణ వ్యక్తిగతాభిప్రాయమని ఆయన మీడియా ప్రతినిధులతో అన్నారు. అయితే, మరో మంత్రి శత్రుచర్ల విజయరామరాజు మాత్రం వ్యతిరేకించారు. బొత్స వ్యాఖ్యలు ఉత్తరాంధ్ర ప్రజల మనోభావాలకు అనుగుణంగా లేవని ఆయన అన్నారు.