బాబూ! తెలంగాణలో యాత్ర చేయి!: శంకరరావు

హైదరాబాద్: పెట్రే ధరల పెంపును నిరసిస్తూ తెలుగుదేశం పార్టీ అధ్యక్షుడు నారా చంద్రబాబు నాయుడు శాసనసభకు సైకిల్ యాత్ర చేయడాన్ని కాంగ్రెసు సీనియర్ శాసనసభ్యుడు పి శంకరరావు తీవ్రంగా వ్యతిరేకించారు. చంద్రబాబు దమ్ముంటే తెలంగాణలో సైకిల్ యాత్ర చేయాలని ఆయన సవాల్ చేశారు. తెలంగాణ విద్యార్థుల ఆత్మహత్యలు జరుగుతున్నాయని, నిరసనలు వెల్లువెత్తుతున్నాయని, వీటిని ఆపు చేసి శాంతి నెలకొల్పడానికి, వారి సమస్యలను పరిష్కరించడానికి చంద్రబాబు తెలంగాణలో సైకిల్ యాత్ర చేయాలని ఆయన అన్నారు.

తెలంగాణకోసం చంద్రబాబు ఏం చేస్తారో చెప్పాలని ఆయన డిమాండ్ చేశారు. తెలంగాణ కోసం తెలంగాణ రాష్ట్ర సమితి (తెరాస) శాసనసభ్యులు రాజీనామా చేశారని, అందువల్ల వారిని ఏకగ్రీవంగా ఎన్నుకునేలా చూడాల్సిన బాధ్యత అన్ని పార్టీల తెలంగాణ నాయకులపై ఉందని ఆయన అన్నారు. తెరాస అభ్యర్థులపై శాసనసభ ఎన్నికల్లో ఇతర పార్టీలు పోటీ పెట్టకపోవడం మంచిదని ఆయన అభిప్రాయపడ్డారు.