శివరామిరెడ్డిపై ఎమ్మెల్యే చంద్రావతి ఫిర్యాదు

హైదరాబాద్: పార్కింగ్ స్థలం విషయంలో ఇద్దరు ప్రజాప్రతినిధుల మధ్య వివాదం చెలరేగింది. హైదరాబాదులోని న్యూఎమ్మెల్యే క్వార్టర్స్ లో కాంగ్రెసు ఎమ్మెల్సీ, సిపిఐ శాసనసభ్యురాలు చంద్రావతి మధ్య వివాదం చెలరేగింది. శాసనమండలి విప్ గా పనిచేస్తున్న శివరామిరెడ్డిపై ఖమ్మం జిల్లా వైరా నుంచి శాసనసభకు ఎన్నికైన చంద్రావతి స్పీకర్ కిరణ్ కుమార్ రెడ్డికి ఫిర్యాదు చేశారు.

తన పార్కింగ్ స్థలాన్ని శివరామిరెడ్డి వాడుకుంటున్నారని, అదేమంటే బెదిరిస్తున్నారని చంద్రావతి ఫిర్యాదు చేశారు. తాను రాయలసీమకు చెందినవాడినని, ఏమైనా అంటే దాడి చేస్తానని శివరామిరెడ్డి బెదిరిస్తున్నట్లు ఆమె ఆరోపిస్తున్నారు. తనతో పెట్టుకుంటే మంచిది కాదని బెదిరిస్తున్నట్లు ఆమె చెప్పారు. చంద్రావతి, శివరామిరెడ్డి క్వార్టర్లు పక్కపక్కనే ఉంటాయి. శివరామిరెడ్డి అనుచరులు పెద్ద యెత్తున క్వార్టర్ ముందు గుమికూడి డిస్టర్స్ చేస్తున్నట్లు కూడా తెలుస్తోంది.

వై శివరామిరెడ్డి గతంలో శాసనసభ్యుడిగా కూడా ఉన్నారు. చంద్రావతి ఫిర్యాదు విషయాన్ని శాసనసభ స్పీకర్ కిరణ్ కుమార్ రెడ్డి శాసనమండలి చైర్మన్ చక్రపాణి దృష్టికి తీసుకుని వెళ్లే అవకాశం ఉంది. వారిద్దరి మధ్య గల సమస్యను స్పీకర్, మండలి చైర్మన్ సామరస్యపూర్వకంగా పరిష్కరించే అవకాశం ఉంది.