సైనికి ఆయుధ డిపోలో భారీ అగ్నిప్రమాదం

కోల్ కత్తా: పశ్చిమ బెంగాల్ లోని బుర్ద్వాన్ డిల్లా పనగడ్ వద్ద గల సైనిక ఆయుధ డిపోలో శుక్రవారం తెల్లవారు జామున భారీ అగ్ని ప్రమాదం సంభవించింది. తెల్లవారు జామున ఒంటి గంట నుంచి రెండు గంటల పాటు భారీ పేలుళ్ల శబ్దాలు వినిపించాయి. దేశ తూర్పు ప్రాంతంలోని అతి పెద్ద ఆయుధ డిపోల్లో ఇది ఒకటి. డిపోలోని 16వ షెడ్డులో ఈ ప్రమాదం సంభవించింది. ఐదు నిమిషాల్లో సైన్యం అప్రమత్తమై మంటలను ఆర్పేందుకు సిద్ధపడిందని తూర్పు కమాండ్ వింగ్ కమాండర్ ఎం ఉపాసని చెప్పారు.

దాదాపు శుక్రవారం ఉదయం మూడున్నర గంటల ప్రాంతంలో మంటలు అదుపులోకి వచ్చాయి. షెడ్ పూర్తిగా ధ్వంసమైంది. ప్రాణ నష్టమేదీ సంభవించలేదు. ఎవరూ గాయపడలేదు. ఆయుధాలు, మందు గుండు సామగ్రి ఈ ప్రమాదంలో దగ్ధమయ్యాయి. మంటలు ఉవ్వెత్తున ఎగిసి పడడంతో స్థానికులు భయందోళనలకు గురయ్యారు.