ఫాక్షన్ పడగ: టిడిపి కార్యకర్త హత్య

కడప: కడప జిల్లాలో మరోసారి ఫాక్షన్ పడగ విప్పింది. తెలుగుదేశం పార్టీ కార్యకర్త దారుణ హత్యకు గురయ్యాడు. కడప జిల్లా కొండాపురం మండలం వెంకయ్యపాలెం గ్రామంలో వీరయ్య అనే తెలుగుదేశం పార్టీ కార్యకర్తను ప్రత్యర్థులు నరికి చంపారు. పొలానికి వెళ్తుండగా ప్రత్యర్థులు మాటు వేసి వీరయ్యను తరిమి తరిమి కత్తులతో నరికి చంపారు. మూడు రోజుల క్రితమే చెన్నకేశవ రెడ్డి అనే తెలుగుదేశం పార్టీ కార్యకర్త హత్య జరిగింది.

మూడు నెలల క్రితం కొండాపురం మండలంలో పెద్దిరెడ్డి అనే కాంగ్రెసు పార్టీ కార్యకర్త దారుణ హత్యకు గురయ్యాడు. పెద్దిరెడ్డి హత్య వెనక చెన్నకేశవ రెడ్డి, వీరయ్యలే ప్రధాన పాత్ర పోషించారని కాంగ్రెసు కార్యకర్తలు అనుమానిస్తూ వస్తున్నారు. దీనివల్లనే చెన్నకేశవ రెడ్డి, వీరయ్యల హత్యలు జరిగాయని భావిస్తున్నారు. అయితే వీరయ్య హత్య పాతకక్షల వల్లనే జరిగిందని పోలీసులు చెబుతున్నారు.