నేతలంతా తెలంగాణకు కట్టుబడాలి: నాగం

హైదరాబాద్: తెలంగాణకు వ్యతిరేకంగా తమ పార్టీ నేత దాడి వీరభద్ర రావు చేసిన ప్రకటనను తెలుగుదేశం తెలంగాణ ఫోరం కన్వీనర్ నాగం జనార్దన్ రెడ్డి ఖండించారు. ప్రత్యేక తెలంగాణకు అనుకూలంగా ఎన్నికలకు ముందు తమ పార్టీ తీసుకున్న నిర్ణయానికి పార్టీ నాయకులంతా కట్టుబడి ఉండాలని ఆయన అన్నారు. తమ పార్టీ అధ్యక్షుడు నారా చంద్రబాబు నాయుడు కూడా తెలంగాణకు కట్టుబడి ఉన్నారని ఆయన సోమవారం మీడియా ప్రతినిధుల సమావేశంలో చెప్పారు.

తెలంగాణకు వ్యతిరేకంగా దాడి చేసిన వ్యాఖ్యలను ఆయన తప్పు పట్టారు. దాడి వీరభద్ర రావు ప్రకటన పార్టీకి వ్యతిరేకమని ఆయన అభిప్రాయపడ్డారు. ఎన్నికలకు ముందు సీమాంధ్ర నాయకులు తెలంగాణ అనుకూల నిర్ణయాన్ని ఎందుకు వ్యతిరేకించలేదని ఆయన ప్రశ్నించారు. పార్టీలో లోతుగా చర్చించిన తర్వాతనే తెలుగుదేశం పార్టీ ప్రత్యేక తెలంగాణకు అనుకూలంగా నిర్ణయం తీసుకుందని ఆయన చెప్పారు. తాము ఆ నిర్ణయానికి కట్టుబడి ఉండబోమని దాడి వీరభద్ర రావు అనడం సరి కాదని ఆయన అన్నారు.