హెడ్లీ విచారణకు భారత్ కు అనుమతి: ఒబామా

వాషింగ్టన్: ముంబై దాడుల సూత్రధారి డేవిడ్ కోలెమన్ హెడ్లీని భారత్ నేరుగా విచారించేందుకు అవకాశం కల్పిస్తామని అమెరికా అధ్యక్షుడు బరాక్ ఒబామా ప్రధాని డాక్టర్ మన్మోహన్ సింగ్ కు హామీ ఇచ్చారు. హెడ్లీని భారత్ నేరుగా ప్రశ్నించేందుకు అవసరమైన చట్టపరమైన అంశాలను పరిశీలిస్తున్నామని ఆయన చెప్పారు. అణు భద్రత సదస్సు వేదిక వద్ద ఆయన ఈ విషయం చెప్పారు. హెడ్లీ అంశాన్ని మన్మోహన్ సింగ్ ఒబామాతో ప్రస్తావించారని, లష్కరే తోయిబా చీఫ్ హఫీజ్ సయీద్ విషయం కూడా మట్లాడారని భారత విదేశాంగ కార్యదర్శి నిరుపమారావు మీడియా ప్రతినిధులతో చెప్పారు.

హెడ్లీని భారత్ నేరుగా విచారించేందుకు అవకాశం కల్పించే విషయంలో ఒబామా సానుకూలంగా స్పందించారని ఆమె చెప్పారు. ఉగ్రవాదం పల్ల అభివృద్ధిపై ప్రతికూల ప్రభావం పడే అవకాశం ఉందని మన్మోహన్ ఒబామాతో చెప్పారు. ముంబై దాడుల నిందితులను శిక్షించే విషయంలో పాకిస్తాన్ చిత్తశుద్ధితో వ్యవహరించడం లేదని మన్మోహన్ ఒబామాకు ఫిర్యాదు చేసినట్లు ఆమె తెలిపారు. భారత ప్రయోజనాలను దృష్టిలో పెట్టుకుని పాకిస్తాన్ తో తాము వ్యవహరిస్తామని ఒబామా హామీ ఇచ్చినట్లు ఆమె చెప్పారు.