నాది రాజకీయ యాత్ర కాదు: జగన్

హైదరాబాద్: తెలంగాణలో తాను చేసేది రాజకీయ యాత్ర కాదని కాంగ్రెసు కడప పార్లమెంటు సభ్యుడు వైయస్ జగన్ స్పష్టం చేశారు. ఆయన ఈ నెల 28వ తేదీ నుంచి తెలంగాణలోని వరంగల్ జిల్లాలో ఓదార్పు యాత్ర తలపెట్టిన విషయం తెలిసిందే. తన తండ్రి, దివంగత ముఖ్యమంత్రి వైయస్ రాజశేఖర రెడ్డి ఆకస్మిక మృతి తట్టుకోలేక మృతి చెందినవారి కుటుంబాలను పరామర్శించడానికి మాత్రమే ఈ యాత్రను తలపెట్టినట్లు ఆయన ఓ ప్రకటనలో చెప్పారు.

తెలంగాణవాదుల నుంచి తీవ్ర వ్యతిరేకత ఎదురవుతుండడంతో ఆయన ఈ ప్రకటన చేశారని భావించవచ్చు. తన యాత్ర రాజకీయ ప్రసంగాలకో, సన్మానాలకో కాదని జగన్ అన్నారు. తాను ఇప్పటికే పశ్చిమ గోదావరి, ఖమ్మం జిల్లాల్లో పర్యటించినట్లు ఆయన తెలిపారు. తన చూడడానికో, తనను కలవడానికే పనులు చెడగొట్టుకుని రావద్దని ఆయన ప్రజలకు విజ్ఞప్తి చేశారు.