బాలయ్యపై వ్యాఖ్యకు నాలుక కరుచుకున్న చంద్రబాబు నాయుడు

హైదరాబాద్: తన బావమరిది, ప్రముఖ సినీనటుడు బాలకృష్ణపై చేసిన వ్యాఖ్యకు తెలుగుదేశం పార్టీ అధ్యక్షుడు నారా చంద్రబాబు నాయుడు నాలుక కరుచుకున్నారు. బాలయ్య రాజకీయాల్లో రాణిస్తారు, సినిమాల్లో రాణిస్తారు అని పరమవీర చక్ర సినిమా షూటింగ్ ప్రారంభోత్సవ కార్యక్రమంలో ఆయన అన్నారు. జోష్ లో ఆ వ్యాఖ్య చేసిన చంద్రబాబు తర్వాత సంభవించే పరిణామాలకు జంకారో, భయపడ్డారో గానీ దానికి వివరణ ఇచ్చుకున్నారు. గురువారం ఉదయం ఆ వ్యాఖ్య చేసిన చంద్రబాబు సాయంత్రం మీడియా ప్రతినిధుల సమావేశంలో వివరణ ఇచ్చారు.

తన వ్యాఖ్యకు వేరే అర్థాలు తీయవద్దని చంద్రబాబు మీడియా ప్రతినిధులను కోరారు. బాలకృష్ణ రాజకీయాల్లో క్రియాశీలకంగానే ఉన్నారని ఆయన చెప్పారు. తెలుగుదేశం పార్టీ తరఫున బాలకృష్ణ విస్తృతంగా ప్రచారం చేసిన విషయాన్ని గుర్తు చేశారు. బాలకృష్ణ ఇప్పటికే రాజకీయాల్లో ఉన్నారని ఆయన చెప్పారు.