వైయస్ జగన్ పై మరోసారి కాంగ్రెసు ఎమ్మెల్యే శంకర రావు నిప్పులు

హైదరాబాద్: తమ పార్టీ కడప పార్లమెంటు సభ్యుడు వైయస్ జగన్ పై కాంగ్రెసు సీనియర్ శానససభ్యుడు పి. శంకర రావు మరోసారి నిప్పులు చెరిగారు. దివంగత నేత వైయస్ రాజశేఖర రెడ్డి ఆస్తులపై సవాల్ విసిరారు. వైయస్ ఆస్తులపై తాను బహిరంగ చర్చకు సిద్ధమని, ఈ చర్చను కడపలో పెట్టినా తాను రావడానికి సిద్ధంగా ఉన్నానని ఆయన మంగళవారం మీడియా ప్రతినిధుల సమావేశంలో అన్నారు. వైయస్ లక్షల కోట్ల రూపాయల ఆదాయం వచ్చేలా సంపాదించారని ఆయన ఆరోపించారు. జగన్ కు మద్దతిస్తున్న శాసనసభ్యురాలు కొండా సురేఖకు కూడా ఆయన సవాల్ విసిరారు.

తాను వైయస్ రాజశేఖర రెడ్డి వల్ల గెలవలేదని, తమ పార్టీ అధ్యక్షురాలు సోనియా గాంధీ వల్ల, పార్టీ వల్ల గెలిచానని ఆయన చెప్పారు. తాను రాజీనామా చేసి మళ్లీ పోటీ చేసి గెలుస్తానని, కొండా సురేఖ అలా గెలవగలరా అని ఆయన అన్నారు. గాంధీ, నెహ్రూ కుటుంబాల వల్లనే వైయస్ రాజశేఖర రెడ్డి ముఖ్యమంత్రి అయ్యారని ఆయన చెప్పారు.