అంబటి రాంబాబుపై చర్య బాధాకరం: వైయస్ జగన్

రాజమండ్రి: కాంగ్రెసు నాయకుడు అంబటి రాంబాబు సస్పెన్షన్‌ తనకు చాలా బాధకలిగించిందని కడప ఎంపి వైఎస్‌ జగన్మోహన రెడ్డి అన్నారు. హుకుంపేటలో ఓదార్పు యాత్రకు బయలుదేరే ముందు జగన్‌ విలేకరులు అడిగిన ప్రశ్నలకు సమాధానాలు చెప్పారు. అంబటి విషయం తెలిసి తన మనసు కలత చెందిందన్నారు. బాధను వ్యక్తం చేశారు. అంబటి గొప్ప నాయకుడు అన్నారు. నాన్న వైఎస్‌ఆర్‌తో పాటు అంబటి రాంబాబు 1500 కిలో మీటర్లు పాదయాత్రలో పాల్గొన్న వ్యక్తి అన్నారు. అటువంటి నాయకులు నాన్నతో అడుగులో అడుగువేసి నడిచినందునే కాంగ్రెసు‌ పార్టీ రెండు సార్లు గెలిచిందన్నారు.

అంబటి విషయంలో అధిష్టానంతో మాట్లాడతారా అని ప్రశ్నించగా, తాను చేయగలిగినంత చేస్తానని చెప్పారు. తన వంతు కృషి చేస్తానన్నారు. మీతోపాటు తిరిగేవారికి ఇది ఎలాంటి సిగ్నల్‌ ఇస్తుందనగా, "నాకు దేవుడు ఉన్నాడు, నాన్న ఆశీస్సులు ఉన్నాయి' అని అన్నారు. మీతో ఉండేవారికి ఇది వార్నింగ్‌గా భావించవచ్చా అన్న ప్రశ్నకు "నేను ఏమి తప్పు చేస్తున్నానని వార్నింగ్‌ ఇస్తారు' అని తిరిగి ప్రశ్నించారు.