వైయస్సార్ విగ్రహంపై నెల్లూరులో వైయస్ జగన్ వర్గం వీరంగం

నెల్లూరు: నెల్లూరులో వైయస్సార్ విగ్రహం వివాదం మళ్లీ మొదటికొచ్చింది. నెల్లూరులోని కొత్త హాల్ సెంటర్ లో వైయస్సార్ విగ్రహానికి మున్సిపల్ అధికారులు తీవ్ర అభ్యంతరం చెబుతున్నారు. అక్కడ విగ్రహాన్ని ప్రతిష్టించి తీరాల్సిందేనని కాంగ్రెసు కడప పార్లమెంటు సభ్యుడు వైయస్ జగన్ వర్గానికి చెందిన కోటంరెడ్డి శ్రీధర్ రెడ్డి అనుచరులు వీరంగం సృష్టిస్తున్నారు. నెల్లూరు జిల్లాలో ఓదార్పు యాత్ర సందర్భంగా జగన్ ఆ విగ్రహాన్ని ఆవిష్కరించాల్సి ఉంది. అయితే ఇంతకు ముందు వివాదం చెలరేగినప్పుడు అధికారులు అనుమతి ఇచ్చినట్లే ఇచ్చారు. కానీ మళ్లీ అందుకు మంగళవారం తీవ్ర అభ్యంతరం పెట్టారు.

కొత్త హాల్ సెంటర్ వద్ద భారీగా పోలీసులు మోహరించారు. అధికారులను అడ్డుకోవడానికి శ్రీధర్ రెడ్డి అనుచరులు ప్రయత్నిస్తున్నారు. జగన్ అభిమానులు కొంత మంది మూడంతస్థుల భవనంపైకి ఎక్కి, అనుమతి ఇవ్వకపోతే అక్కడి నుంచి ఆత్మహత్య చేసుకుంటామని బెదిరిస్తున్నారు. జగన్ అభిమానులను కొంత మందిని పోలీసులు అదుపులోకి తీసుకున్నారు. దీంతో నెల్లూరులోని కొత్త హాల్ సెంటర్ వద్ద తీవ్ర ఉద్రిక్తత నెలకొంది.