చిరంజీవి సినిమా అధినాయకుడు: రిజిష్టర్ చేసిన మధు?

హైదరాబాద్: ప్రజారాజ్యం పార్టీ అధ్యక్షుడు మెగాస్టార్ చిరంజీవి నటించబోయే చిత్రం పేరు ఖరారైనట్లు తెలుస్తోంది. ఆ సినిమా పేరును అధినాయకుడిగా చెబుతున్నారు. అయితే, చిరంజీవి సినిమా పేరుపై పూర్తి నిర్ణయం తీసుకోలేదని, ఆ పేరును పరిశీలిస్తున్నారని చెబుతున్నారు. అధినాయకుడు టైటిల్ ను ఠాగూర్ చిత్ర నిర్మాత మధు రిజిష్టర్ చేశారు. మధు చిరంజీవి కుటుంబానికి అత్యంత సన్నిహితుడు. దీంతో చిరంజీవి కోసమే మధు ఆ టైటిల్ ను రిజిష్టర్ చేసినట్లు చెబుతున్నారు.

స్టోరీపై చర్చల్లో చిరంజీవి బిజీగా ఉన్నట్లు సమాచారం. సినిమా ఠాగూర్ లా ఉండాలనేది ఆయన అభిమతమని అంటున్నారు. రెండు, మూడు కథలు ఇప్పటికే రెడీ అయ్యాయని, వాటిని చిరంజీవి పరిశీలిస్తున్నారని చెబుతున్నారు. కాగా, మహిళా రాజ్యం నాయకురాలు శోభారాణికి చిరంజీవి సినిమాలో పాత్ర దొరికినట్లు కూడా చెబుతున్నారు. చిరంజీవికి ఆమె చెల్లెలి పాత్రను పోషిస్తున్నారని సమాచారం. ఈ విషయం విన్న శోభారాణి ఎగిరి గంతేస్తున్నారు. తనకు చాలా సంతోషంగా ఉందని ఆమె ఓ టీవీ న్యూస్ చానెల్ తో చెప్పారు.