చిరంజీవి ఫ్యాన్ గురప్పకు ఎట్టకేలకు అందిన ఆర్థిక సాయం

కడప: కళ్లు పోగొట్టుకున్న ప్రజారాజ్యం పార్టీ అధినేత చిరంజీవి అభిమాని గురప్పకు ఆర్థిక సాయం అందింది. కడప జిల్లాకు చెందిన గురప్పకు సాయం చేస్తానని హామీ ఇచ్చిన చిరంజీవి మరిచిపోయాడని ఓ టీవీ చానెల్ లో వార్తాకథనం ప్రసారమైంది. దానిపై ప్రతిస్పందించిన చిరంజీవి కడప జిల్లా అభిమానుల సంఘం కార్యకర్తలు గురప్పకు పది వేల రూపాయల ఆర్థిక సాయం అందించారు. గురప్పకు సాయం అందించడానికి మరింత మంది ముందుకు రావాలని జిల్లా చిరంజీవి అభిమానుల సంఘం అధ్యక్షుడు బద్రి కోరారు.

కడప జిల్లాకు చెందిన గుర్రప్ప అనే మెగా అభిమాని ప్రజారాజ్యం పార్టీ అధినేత చిరంజీవి పై అసంతృప్తితో ఉన్నాడని ఓ టీవీ ఛానల్ ఇటీవల ప్రసారం చేసింది. తాను చిరంజీవి అభిమానినైందుకు కుంగిపోతున్నాడు. బాగా గాయపడ్డ తనకు చిరంజీవి సహాయం చేస్తానని మాట ఇచ్చి ఇప్పటి వరకు చేయకపోవటంతో ఇక ఎవరికి చేస్తాడని ఆయన ప్రశ్నిస్తున్నాడు. మెగా అభిమానంతో ఆయన కళ్లు పొగొట్టుకున్నాడు. చిరంజీవి మాత్రం ఆయన్ను గాలికి వదిలేశాడు. కటిక దారిద్రంలో ఉన్న గుర్రప్పకు ఇచ్చిన హామీని కూడా చిరంజీవి నిలుపుకోలేక పోయారు.

గుర్రప్ప చిన్నప్పటినుండి చిరంజీవికి పెద్ద అభిమాని. చిరంజీవి చిత్రం విడుదలకు ముందు, విడుదల రోజు గుర్రప్పది హడావుడే. చిరంజీవి నటించిన చిత్రం విడుదలకు ముందు ఆయన ప్రతి చిత్రానికి గుర్రప్ప కటౌట్లు కట్టాల్సిందే. తన పనులు మానుకొని మరీ కటౌట్లు కోసం థియేటర్ కు వెళ్లేవాడు. ఇక చిత్రం విడుదలయ్యే రోజు థియేటర్ కు వెళ్లి బాణాసంచా పేల్చి మొదటి ఆట చూసేవాడు. గుర్రప్ప చిరంజీవి ఇంద్ర చిత్రానికీ ఎప్పటి మాదిరే కటౌట్లు కట్టాడు. అయితే చిత్రం విడుదల రోజు బాణసంచా పేల్చుతుంటే ఆయన కళ్లలో పడి కళ్లు పోయాయి. సహాయం చేస్తానన్న చిరంజీవి చుట్టూ చాలాసార్లు తిరిగాడు. అయినా ఫలితం లేకపోయింది.