కెసిఆర్ ప్రాపకం కోసం తపిస్తున్న తెలుగు సినిమా: 20న సమావేశం

హైదరాబాద్: తెలంగాణ రాష్ట్ర సమితి (తెరాస) అధ్యక్షుడు కె. చంద్రశేఖర రావు ప్రాపకం కోసం తెలుగు చిత్రసీమ ప్రయత్నిస్తున్నట్లు సమాచారం. ఇందులో భాగంగా కెసిఆర్ ఈ నెల 20వ తేదీన తెలుగు పరిశ్రమతో సమావేశం కానున్నారు. నిరుడు డిసెంబరు నుంచి ఇప్పటివరకూ తెలంగాణా ఉద్యమ ఫలితంగా తెలుగు సినీ పరిశ్రమ బాగా ఎదురు దెబ్బలు తిన్నది. ముఖ్యంగా సీమాంధ్రకు చెందిన నటులు నటించిన చిత్రాలను తెలంగాణాలో విడుదల చేయాలంటే ఒక సవాల్‌గా మారింది.

సీమాంధ్ర నటుల చిత్రాలు విడుదలైనప్పుడల్లా తెలంగాణా ప్రాంతానికి చెందిన పలు పార్టీలు, నాయకులు సినిమాలను అడ్డుకోవడం, పలుచోట్ల షూటింగ్ లను నిలిపివేయడంతో చిత్ర పరిశ్రమకు భారీగా నష్టం వాటిల్లింది. సినీ పరిశ్రమలో నెలకొన్న భయాలను కెసిఆర్ ఆ సమావేశంలో తొలగిస్తారని భావిస్తున్నారు. తాను సినిమాల విడుదలను అడ్డుకోలేదని, ఇక ముందు అడ్డుకోబోనని కెసిఆర్ కూతురు, తెలంగాణ జాగృతి అధ్యక్షురాలు కల్వకుంట్ల కవిత ప్రకటించడం ఈ నేపథ్యంలో ప్రాధాన్యం సంతరించుకుంది. సినిమాకు, రాజకీయాలకు సంబంధం లేదని ఆమె అన్నారు.