చంద్రబాబుపై ప్రతీకారానికే వైయస్ జగన్ తో చేతులు కలిపిన లక్ష్మీపార్వతి

హైదరాబాద్: తెలుగుదేశం పార్టీ అధ్యక్షుడు నారా చంద్రబాబునాయుడిపై ప్రతీకారం తీర్చుకోవడానికే స్వర్గీయ ఎన్టీ రామారావు సతీమణి లక్ష్మీపార్వతి కాంగ్రెసు కడప పార్లమెంటు సభ్యుడు వైయస్ జగన్ తో చేతులు కలిపినట్లు భావిస్తున్నారు. చంద్రబాబుపై సొంతంగా ప్రతీకారం తీర్చుకునే బలం, బలగం తనకు లేకపోవడంతో ఆమె జగన్ తో చేతులు కలిపినట్లు చెబుతున్నారు. గతంలో కూడా దివంగత ముఖ్యమంత్రి వైయస్ రాజశేఖర రెడ్డికి ఆమె అనుకూలంగా వ్యవహరించారు. శత్రువు శత్రువు మిత్రుడనే సూత్రాన్ని పాటిస్తున్నట్లు చెబుతున్నారు.

వైయస్ జగన్ ఓదార్పు యాత్రను ఆమె సమర్థించారు. వైయస్ రాజశేఖర రెడ్డి ప్రజల కోసం మంచి పనులు చేశారని ఆమె ప్రశంసించారు. తన తండ్రి కోసం ఓదార్పు యాత్ర చేస్తున్న జగన్ కు మద్దతివ్వకపోతే ద్రోహం చేసినవాళ్లమవుతామని ఆమె అంటున్నారు. తాను తప్పకుండా వైయస్ జగన్ ఓదార్పు యాత్రలో పాల్గొంటానని కూడా చెబుతున్నారు.