చంద్రబాబును వదిలేస్తే జూనియర్ ఎన్టీఆర్ కు మద్దతిస్తా: లక్ష్మీపార్వతి

హైదరాబాద్: యువ కథానాయకుడు జూనియర్ ఎన్టీఆర్ తన ఉద్దేశ్యమేమిటో చెబితే మద్దతిస్తానని ఎన్టీఆర్ తెలుగుదేశం పార్టీ అధ్యక్షురాలు లక్ష్మీపార్వతి ప్రకటించింది. జూనియర్ ఎన్టీఆర్ కు మంచి ఫ్యాన్ ఫాలోయింగ్ ఉందన్నారు. తెలుగుదేశం పార్టీ అధ్యక్షుడు చంద్రబాబు నాయుడుని వదిలి జూనియర్ ఎన్టీఆర్ తనో రాజకీయ పంథాను ఏర్పాటు చేసుకుంటే మద్దతివ్వడానికి సిద్దంగా ఉన్నానని ఆమె చెప్పారు.

కాగా చంద్రబాబునాయుడిని ఇప్పుడు విమర్శిస్తున్న తెలంగాణ రాష్ట్ర సమితి అధ్యక్షుడు కె చంద్రశేఖరరావు అందరికంటే ముందుగానే చంద్రబాబు నాయుడితో కలిసి తెలుగుదేశంలో చేరాడని ధ్వజమెత్తారు. తాను చంద్రబాబునాయుడి గురించి నిజాలు బయట పెట్టినందుకు మళ్లీ మరోసారి మాట్లాడటానికి ఉంటానో లేదో అని ఆమె వ్యాఖ్యానించారు. ప్రజా సేవ కోసమే ఎన్టీఆర్ రాజకీయాల్లోకి వచ్చారని ఆమె అన్నారు. ఎన్టీఆర్ కుమారులు తనను తల్లిగా భావించకపోయినా తాను వారిని ఆదరించానని ఆమె చెప్పారు.