చిరంజీవిపై కాంగ్రెసు పార్లమెంటు సభ్యులు మండిపాటు

న్యూఢిల్లీ: ప్రజారాజ్యం పార్టీ అధినేత చిరంజీవిపై కాంగ్రెసు పార్లమెంటు సభ్యులు తీవ్రంగా మండిపడుతున్నారు. వరద తాకిడి ప్రాంతాలకు సహాయం తేవడంలో కాంగ్రెసు ఎంపిలు విఫలమయ్యారంటూ చిరంజీవి విమర్శలు చేశారు. కాంగ్రెసు పార్లమెంటు సభ్యులను దద్దమ్మలుగా, స్వార్థపరులుగా అభివర్ణించారు. తమకు ఒక్క పార్లమెంటు సభ్యుడున్నా కేంద్ర ప్రభుత్వాన్ని నిలదీసి ఉండేవాడని ఆయన బుధవారం అన్నారు. దానిపై కాంగ్రెసు పార్లమెంటు సభ్యులు గుర్రుగా ఉన్నారు.

చిరంజీవి రాజకీయ శిక్షణ తీసుకోవాల్సిన అవసరం ఉందని కాంగ్రెసు పార్లమెంటు సభ్యుడు పొన్నం ప్రభాకర్ అన్నారు. రాష్ట్రానికి ప్రయోజనాలు చేకూర్చే విషయంలో కాంగ్రెసు పార్లమెంటు సభ్యులమంతా కలిసికట్టుగా పని చేస్తున్నామని ఆయన బుధవారం మీడియా ప్రతినిధుల సమావేశంలో చెప్పారు. చిరంజీవి వ్యాఖ్యలను ఆయన తీవ్రంగా ఖండించారు.